Mánaðarlegt færslusafn July, 2017

Útlit er fyrir fjölda frumsýninga íslenskra kvikmynda í haust og á fyrrihluta næsta árs eða sextán bíómynda og að minnsta kosti átta heimildamynda í fullri lengd. Aldrei áður hafa jafn margar myndir verið tilbúnar eða á lokastigum vinnslu.

Elísabet Ronaldsdóttir klippari ræðir vinnu sína við kvikmyndina Atomic Blonde, með Charlize Theron í aðahlutverki, við kollega sinn Steve Hullfish sem heldur úti dálkinum Art of the Cut á vefnum Pro Video Coalition. Þetta er afar ítarlegt og áhugavert spjall tveggja klippara þar sem bæði er farið í einstök atriði sem lúta að myndinni sjálfri sem og víðara spjall um hlutverk klipparans almennt.

Undir trénu Hafsteins Gunnars Sigurðssonar hefur verið valin til þátttöku í Orrizonti keppni Kvikmyndahátíðarinnar í Feneyjum sem er hluti af aðaldagskrá hennar. Feneyjahátíðin er stofnuð 1932 og því sú elsta sinnar tegundar, ein af hinum þremur stóru ásamt Cannes og Berlín. Hún verður haldin í 74. skiptið í ár dagana 30. ágúst til 9. september.

Veigar Margeirsson tónskáld semur tónlist fyrir stiklu kvikmyndarinnar Ready Player One sem Steven Spielberg leikstýrir. Myndin kemur út á næsta ári en stiklan er kynnt á yfirstandandi Comic Con hátíð í San Diego.

Ólafur H. Torfason kvikmyndagagnrýnandi með meiru, lést 17. júlí s.l. á sjötugasta aldursári. Ásgrímur Sverrisson minnist hans hér með nokkrum orðum.

Framleiðslu þáttaraðarinnar Flateyjargátan, er byggjast á bók Viktors Arnars Ingólfssonar, hefur verið slegið á frest þar sem ekki fékkst úthlutun úr Kvikmyndasjóði.

Rökkur Erlings Thoroddsen hlaut sérstök verðlaun fyrir listrænt framlag á Outfest hátíðinni sem lauk s.l. helgi. 

Fyrstu vísbendingar um veltuna í íslenska kvikmynda- og sjónvarpsgeiranum á þessu ári má sjá í nýju grafi sem Hilmar Sigurðsson hefur gert og byggir á gögnum Hagstofunnar. Veltutölur fyrir tímabilið janúar-apríl sýna um helmings lækkun frá sambærilegu tímabili síðasta árs en engu að síður er þetta þriðja hæsta veltan í sögunni.

Baltasar Kormákur dvelur nú á Fiji-eyjum við tökur á kvikmyndinni Adrift með Shailene Woodley í aðalhlutverki. Tökumaður myndarinnar er engin annar en Robert Richardson, þrefaldur Óskarsverðlaunahafi og einn sá kunnasti sinnar tegundar. Lilja Sigurlína Pálmadóttir, eiginkona Baltasars, birtir þessa mynd á Fésbókarsíðu sinni af þeim Baltasar og Robert Richardson og gaf Klapptré góðfúslegt leyfi til að birta.

Kjartan Kjartansson hljóðhönnuður ræddi á dögunum við Síðdegisútvarp Rásar 2 um hljóðsetningu kvikmynda vítt og breitt. Kjartan, sem er einn sá reyndasti í sínu fagi hér á landi, segir hljóðsetningu kvikmynda vera eins og fallega lygi, eða skáldskap.

Askja Films og Rebella Filmworks, framleiðendur kvikmyndarinnar Tryggðarpantur sem fer í tökur í haust, munu halda sérstaka kynningu á fyrirbærinu Teymisfjármögnun (Crewfunding) í samvinnu við breska fyrirtækið Big Couch.

Stephen Farber skrifar í The Hollywood Reporter um Rökkur eftir Erling Thoroddsen, sem nú er sýnd á Outfest hátíðinni í Los Angeles. Hann segir Íslendinga hafa sent frá sér nokkrar sterkar spennumyndir á undanförnum árum og að þessi verði að teljast með þeim forvitnilegustu.

Laufey Guðjónsdóttir, forstöðumaður Kvikmyndamiðstöðvar Íslands, ræddi við útvarpsstöðina K100 um nýgerða úthlutun til annarrar syrpu Ófærðar og þær deilur sem hafa skapast vegna þess. Horfa má á viðtalið hér.

Gísli Örn Garðarsson ræðir meðal annars um fyrirhugaða þáttaröð sem Vesturport er með í undirbúningi í samvinnu við RÚV, í viðtali við Morgunblaðið. Þáttaröðin kallast Verbúð og verður í átta hlutum. Verkefnið var kynnt á Scandinavian Screenings á dögunum.

Tökur hófust í gær á Nesjavallavegi á kvikmynd Benedikts Erlingssonar, Kona fer í stríð. Hér má sjá nokkrar svipmyndir frá tökum.

SÍK hefur óskað eftir fundi með fulltrúum Kvikmyndamiðstöðvar og mennta- og menningarmálaráðuneytisins vegna úthlutunar til annarrar syrpu Ófærðar. Þetta kemur fram í Fréttablaðinu.

Laurence Boyce hjá Cineuropa skrifar umsögn um Atelier, útskriftarmynd Elsu Maríu Jakobsdóttur frá Danska kvikmyndaskólanum. Myndin var sýnd á nýliðinni Karlovy Vary hátíð.

Elsa María Jakobsdóttir ræðir við Cineuropa um útskriftarmynd sína Atelier, sem sýnd var á nýliðinni Karlovy Vary hátíð undir merki Future Frames.