Daglegt færslusafn: Jan 5, 2015

Lionsgate og Roadside Attractions dreifa „Z for Zachariah“

Bandarísku dreififyrirtækin Lionsgate og Roadside Attractions munu dreifa kvikmyndinni Z for Zachariah sem Skúli Malmquist og Þórir Snær Sigurjónsson hjá Zik Zak kvikmyndum framleiða  í samvinnu við Tobey Maguire, Sigurjón Sighvatsson og fleiri aðila. Myndin verður frumsýnd á Sundance hátíðinni í lok janúar.

Forsýningar á „Fortitude“ á Reyðarfirði

Íbúum Fjarðabyggðar er boðið á sérstaka forsýningu á bresku þáttunum Fortitude, sem voru af stórum hluta teknir upp á Reyðarfirði og á Eskifirði. Forsýningin fer fram í Félagslundi í Reyðafirði. Um er að ræða tvær sýningar, sú fyrri klukkan 18 og sú síðari klukkan 21. Þættirnir verða sýndir á RÚV og hefjast sýningar í byrjun febrúar.

Greining | Enn líf í fjórðu Sveppamyndinni

Algjör Sveppi og Gói bjargar málunum er áfram í fjórtánda sæti aðsóknarlistans eftir tíundu sýningarhelgi, sem jafnframt er sú fyrsta á árinu. Myndina sáu 273 manns í liðinni viku, þar af 146 um helgina. Myndin hefur fengið alls 32.786 gesti.

34 alþjóðleg verðlaun til íslenskra kvikmynda 2014

Fjórtán íslenskar kvikmyndir hlutu alls 34 alþjóðleg verðlaun á kvikmyndahátíðum víða um heim 2014 (33 verðlaun 2013). Hæst bera Kvikmyndaverðlaun Norðurlandaráðs til handa Hross í oss og Nordisk Panorama verðlaunin til heimildamyndarinnar Salóme. Báðar myndirnar eru verðlaunum hlaðnar, Salóme hlaut alls þrenn verðlaun á árinu en Hross í oss níu (auk þess hlaut Salóme áhorfendaverðlaun á Skjaldborgarhátíðinni og Hrossin fengu sex Eddur).