Mánaðarlegt færslusafn January, 2021

Hér er listi yfir áhorf á íslenskar bíómyndir, heimildamyndir, stuttmyndir og leikið sjónvarpsefni í sjónvarpi árið 2020.

Svar við bréfi Helgu eftir Ásu Helgu Hjörleifsdóttur og Dýrið eftir Valdimar Jóhannsson eru meðal þeirra mörgu væntanlegu mynda sem Screen telur að vekja muni áhuga kvikmyndahátíða á árinu.

Pegasus kynnir kvikmyndina Leynilögga í leikstjórn Hannesar Þórs Halldórssonar á markaði Gautaborgarhátíðarinnar sem nú er framundan. Tökum er lokið.

Baldvin Z vinnur nú að gerð fjögurra þátta sjónvarpsseríu um ævi Vigdísar Finnbogadóttur fyrrverandi forseta Íslands. Verkefnið hefur verið lengi í bígerð en Klapptré sagði fyrst frá slíkum fyrirætlunum 2014.

Opnað hefur verið fyrir innsendingar á kvikmynda- og sjónvarpsverkum fyrir Edduna 2021. Gjaldgeng eru verk frumsýnd opinberlega á tímabilinu 1. janúar til 31. desember 2020.

Aðsókn á íslenskar kvikmyndir í bíó 2020 jókst verulega miðað við 2019, sem reyndar var slappt ár aðsóknarlega. Aukningin er um 15%. Síðasta veiðiferðin er mest sótta bíómynd ársins.

Heimildamynd Jóhanns Jóhannssonar heitins, Last and First Men, verður tekin til sýninga í Bíó Paradís 22. janúar. Myndin var frumsýnd á Berlínarhátíðinni fyrir ári og vakti mikla athygli. Hún var einnig sýnd á Skjaldborgarhátíðinni síðastliðið haust.

Franska kvikmyndahátíðin fer fram í tuttugusta og fyrsta sinn dagana 4.- 14. febrúar í Bíó Paradís. Hluti myndanna verður einnig í boði á efnisveitunni HeimaBíó Paradís. Opnunarmyndin er Sumarið '85 (Été 85) eftir François Ozon.

RVK Studios framleiðir kvikmyndina Against the Ice fyrir Netflix og er tökum á myndinni nýlokið hér á landi. Hún verður sýnd síðar á árinu. Danski leikarinn Nikolaj Coster-Waldau fer með aðalhlutverkið en þetta er ástríðuverkefni hans. Danski leikstjórinn Peter Flinth (Arn: The Knight Templar) stýrir. Nordic Film and TV News fjallar um myndina.

Jóhann Ævar Grímsson er tilnefndur til Norrænu sjónvarpshandritaverðlaunanna í ár fyrir þáttaröðina Systrabönd sem væntanleg er í Sjónvarp Símans á þessu ári. Verðlaunin verða afhent á Gautaborgarhátíðinni. Nordic Film & TV News ræddi við hann af þessu tilefni.

Hvernig á að vera klassa drusla eftir Ólöfu Birnu Torfadóttur og Skuggahverfið eftir Karolina Lewicka og Jón Einarsson Gústafsson verða báðar frumsýndar í febrúar og hefja þar með íslenska bíóárið.

"Hugmyndir um kvikmyndanám á háskólastigi eru langt frá því að vera nýjar af nálinni. Áætlanir og umræður um slíka deild hafa verið í deiglunni síðastliðna tvo áratugi eða svo. Í ljósi þeirrar umræðu sem skapast hefur að undanförnu um nám í kvikmyndagerð á háskólastigi er rétt að setja málið í frekara samhengi og árétta nokkur atriði." Þetta er meðal þess sem kemur fram í bréfi sem hópur íslensks kvikmyndafólks skrifar undir.

Heiðursverðlaunahafi Reykjavik Feminist Film Festival í ár er Halla Kristín Einarsdóttir kvikmyndagerðarkona en hún hefur gert kvikmyndir á borð við Konur á rauðum sokkum og Hvað er svona merkilegt við það. Halla Kristín gerði fyrstu kvikmyndina um transgenderisma á Íslandi, Transplosive (2006) og verður hún sýnd á hátíðinni. Hér að neðan má sjá viðtal við hana sem birtist á vef hátíðarinnar, en myndir hennar má skoða hér í dag sunnudag.

Reykjavik Feminist Film Festival (RVK FFF) lýkur í kvöld með afhendingu Systurverðlaunanna. Hægt er að horfa frítt á myndir hátíðarinnar á vef hátíðarinnar í dag, en eftirtaldar myndir fá verðlaun.

Forstjóri Sagafilm óttast að þurfa að segja upp öllu sínu starfsfólki, verði frumvarp til breytinga á lögum um endurgreiðslur í kvikmyndaiðnaði samþykkt. Önnur framleiðslufyrirtæki hafa gert alvarlegar athugasemdir við fyrirhugaðar breytingar. Þetta kemur fram á vef RÚV.

Sumarljós og svo kemur nóttin eftir Elfar Aðalsteins hefur verið valin til þátttöku í verk í vinnslu hluta Les Arcs kvikmyndahátíðarinnar. 17 kvikmyndir í eftirvinnslu verða kynntar fyrir fagaðilum í kvikmyndaiðnaðinum, en viðburðurinn er hluti af Industry Village sem fer fram í stafrænu formi dagana 20.-22. janúar.

Heimildamynd Önnu Hildar Hildibrandsdóttur, A Song Called Hate, mun taka þátt í keppni norrænna heimildamynda (Nordic Documentary Competition) á kvikmyndahátíðinni í Gautaborg, sem haldin verður dagana 29. janúar - 8. febrúar. Hátíðin er sú stærsta á Norðurlöndunum og fer nú fram í 44. skipti, en að þessu sinni í stafrænu formi.

Alþjóðlega stuttmyndahátíðin The Northern Wave Film Festival, sem átti að fara fram síðastliðið haust, hefur verið frestað um ár, eða til 22.-24. október 2021. Í kjölfar heimsfaraldurs var sýningum mynda sem átti að sýna árið 2020 frestað ásamt öðrum fylgifiskum hátíðahaldanna. Allar myndir sem staðfestar voru á síðasta ári verða sýndar á hátíðinni í október næstkomandi.