Fyrsta Hobbitamyndin mest sótt 2013

The Hobbit: An Unexpected Journey var mest sótta myndin á Íslandi 2013.

Árið 2013 voru seldir 1.369.901 miðar fyrir 1.484.362.247.- krónur í kvikmyndahúsum á Íslandi. Er þetta fækkun á bíógestum um  4% á milli ára en heildartekjur eru einnig niður um 2% miðað við árið 2012.

Þetta kemur fram í fréttatilkynningu frá SMÁÍS, samtökum myndrétthafa á Íslandi.

Þar segir einnig að meðalverð á bíómiða á Íslandi árið 2012 hafi verið 1.084.kr, sem er ennþá það lægsta sem gerist á meðal nágrannaþjóða enda nálægt því meðalverði sem bandaríkjamenn greiddu, sem var $8.05. Þess ber þó að geta að vsk er mun hærri hér á Íslandi en í bandaríkjunum.

Bandarískar kvikmyndir nutu mikilla vinsælda á árinu, eins og oft áður, en að þessu sinni voru allar myndirnar í efstu 20 sætum þaðan. The Hobbit: An Unexpected Journey trónir í efsta sæti á undan þriðju myndinni um Iron Man sem er í öðru sæti rétt á undan öðrum hluta The Hobbit: Desolation of Smaug, sem hefur fengið mjög góða aðsókn á síðustu vikum. Hasarmyndin 2 Guns, sem leikstýrð er af Baltasar Kormáki, er í áttunda sæti en engin íslensk mynd er inná topp 20 listanum í ár.

Hross í oss í 24. sæti – markaðshlutdeild íslenskra mynda dregst verulega saman milli ára

Hross í oss er sú íslenska mynd sem kemst næst því að komast inná topp 20 listann, með tekjur uppá tæpar 20 milljónir sem nægir til að lenda í 24. sæti en næsta íslenska mynd á eftir henni er gamanmyndin Ófeigur gengur aftur í 33 sæti með tekjur uppá tæpar 14.5 milljónir króna. Í heildina nema tekjur af íslenskum kvikmyndum tæpum 3% af heildartekjum 2013 og eru rúmlega 2% af aðsókn. Þetta er verulega lakari hlutfall en árið áður þar sem hlutur íslenskra mynda nam rúmlega 11% af heildartekjum. SMÁÍS segir þetta fara langan veg í að skýra minnkun á heildartekjum milli ára.

13% samdráttur í kvikmyndahúsaðsókn frá 2010 – SMÁÍS kennir niðurhali um

Frá árinu 2010 hefur aðsókn í kvikmyndahús á Íslandi minnkað um 13% en á sama tímabili hefur aðsókn í kvikmyndahús í Bandaríkjunum hækkað um 1%. Þar sem aðbúnaður kvikmyndahúsa á Íslandi er með því allra besta sem gerist í heiminum og meðalverð það lægsta sé borið saman við nágrannalönd segir SMÁÍS greinilegt að ólöglegt niðurhal taki sinn toll og bendir á að hvorki íslensk stjórnvöld né lögregla hafi tekið þátt í að verja hinar skapandi greinar líkt og gert er í öðrum löndum í kringum okkur sem við miðum okkur gjarnan við.

Hérna er listi yfir 20 stærstu myndir ársins 2013 á Íslandi sem eru allar bandarískar að þessu sinni.

Athugasemdir

álit