Heimildamyndin Jörðin undir fótum okkar, í leikstjórn Yrsu Rocu Fannberg, er á meðal kvikmyndaverkefna sem hljóta styrk í þriðju úthlutun Eurimages á árinu. Veitt er úr sjóðnum þrisvar sinnum á ári til samframleiðsluverkefna.
Í myndinni eru hversdagslegir atburðir, gleðilegir og sorglegir, fangaðir á filmu á meðan lífið heldur áfram í allri sinni fegurð hjá heimilisfólki á hjúkrunarheimilinu Grund.
Myndin hlýtur styrk upp á 48 000 evrur, eða um 7,2 milljónir króna. Alls eru 29 verkefni í fullri lengd styrkt að þessu sinni, þar af 7 heimildamyndir og 3 teiknimyndir. Heildarúthlutun nemur 8.130.000 evrum.
Í fréttatilkynningu Eurimages segir að af þessum 29 samframleiðsluverkefnum er 14 leikstýrt af konum, eða um 46.9% af heildarúthlutun.
