Ljósbrot Rúnars Rúnarssonar er á meðal verkefna sem hljóta styrki í annarri úthlutun Eurimages-sjóðsins á árinu 2023. Veitt er úr sjóðnum þrisvar sinnum á ári til samframleiðsluverkefna.
Myndin hlýtur styrk upp á 150.000 evrur, eða rúmar 22 milljónir króna. Verkefnið hefur þegar hlotið styrki og vilyrði úr Kvikmyndasjóði upp á 112,4 milljónir króna hlaut fyrir skömmu 19 milljónir frá Norræna sjóðnum.
Alls eru 33 verkefni í fullri lengd styrkt að þessu sinni, þar af 3 heimildamyndir og 2 teiknimyndir. Heildarúthlutun nemur 9.652.000 evrum.
Í fréttatilkynningu Eurimages segir að af þessum 33 samframleiðsluverkefnum er 18 leikstýrt af konum, eða um 56.36% af heildarúthlutun. Sé horft yfir lengra tímabil, sem nær yfir sex síðustu úthlutanir, er meðaltalið 47%.
