Heim Bransinn Netflix pantar músik frá Akureyri

Netflix pantar músik frá Akureyri

-

Sinfónía Nord spilar í Hofi á Akureyri (mynd: Vísir/Tryggvi).

Bandaríska streymisveitan Netflix sendir nú verkefni í gríð og erg til Akureyrar. Sinfóníuhljómsveitin Sinfonia Nord á Akureyri, er ein af fáum, ef ekki sú eina í heiminum, sem getur sinnt kvikmyndatónlistarverkefnum þessa dagana.

Þetta kemur fram á Vísi og þar segir ennfremur:

Miðstöð Sinfonia Nord er í Menningarhúsinu Hofi á Akureyri þar sem hljóðfæraleikarar hafa staðið í ströngu alla helgina, að taka upp kvikmyndatónlist fyrir bandarísku streymisveitinu Netflix. Verkefnin hreinlega hrúgast inn.

„Við eiginlega trúum því ekki hvað er að gerast. Við virðumst vera eina sinfónuhjómsveitin í heiminum sem getur veitt þessa þjónustu núna, ekki það að við vorum löngu byrjaðir á því. Núna erum við að taka upp tónlist fyrir þriðju Netflix-kvikmyndina okkar í röð,“ segir Þorvaldur Bjarni Þorvaldsson, framkvæmdastjóri hljómsveitarinnar.

Það flækir málin að ekki mega vera fleiri en 20 í sama rýminu vegna samkomubannsins auk þess sem að Netflix krefst ýtrustu sóttvarna. Því þurfti að skipta hljómsveitinni upp í minni einingar auk þess sem að enginn komst inn í Hof nema fá grænt ljós frá hjúkrunarfræðingi.

Hljóðfæraleikararnir þurftu að vera með grímu í almennum rýmum og líklega hefur það ekki oft gerst áður að sinfóníuhljómsveit hafi starfað undir vökulum augum fulltrúa almannavarna, sem gætti þess að allt færi fram samkvæmt reglum. En tónlistin hentar þessum varúðarráðstöfunum.

„Við erum að taka upp kvikmyndatónlist fyrir dramatískan þátt, krimma, og þetta er bara svolítið eins og að vera inn í því,“ segir Þorvaldur Bjarni.

Framundan eru minnst þrjú verkefni og Netflix virðist ætla að grípa gæsina eftir að hafa kynnst Sinfoniu Nord í fyrri verkefnum, í febrúar var meðal annars tilkynnt að hljómsveitin myndi taka upp tónlistina í Eurovison-mynd Will Ferrel, þar sem Ísland kemur mjög við sögu.

„Við erum komin með olnbogann inn, þá vill svo til að fólk lítur til okkar þegar það fattar að á Íslandi er kannski langöruggast að vera á meðan á þessu stendur og þess vegna getum við veitt þjónustuna,“ segir Þorvaldur Bjarni en greint hefur verið frá því að Netflix hafi sett nánast alla sjónvarps- og kvikmyndaframleiðslu á ís, nema í tveimur löndum, Suður-Kóreu og Íslandi, vegna árangurs þeirra í baráttunni gegn kórónuveirufaraldrinum.

Sjá nánar hér: Netflix beinir eyrum sínum að Akureyri – Vísir

Klapptré
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri og ábyrgðarmaður er Ásgrímur Sverrisson.

NÝJUSTU FÆRSLUR

Framsókn vill hækka endurgreiðslur í 35% og tífalda veltu

Stór tæki­færi fel­ast í því að styðja enn frek­ar við kvik­mynda­gerð í land­inu og hækka end­ur­greiðslur af fram­leiðslu­kostnaði í 35% líkt og gert er í lönd­um sem keppa við Ísland um verk­efni, segir Sig­urður Ingi Jó­hanns­son, sam­gönguráðherra og formaður Fram­sókn­ar­flokks­ins.

Íslendingar að verða undir í samkeppni um þjónustuverkefni

Leifur B. Dagfinnsson hjá Truenorth segir í viðtali við Fréttablaðið að mörg stór verkefni hafi runnið Íslandi úr greipum undanfarið og að stjórnvöld hafi ekki gert nauðsynlegar breytingar til þess að tryggja samkeppnishæfni landsins. Íslendingar séu að verða undir í alþjóðlegri samkeppni um stór kvikmyndaverkefni út af lágri endurgreiðslu íslenskra stjórnvalda til kvikmyndaframleiðenda.

Wonder Woman, Ísland og framtíðin

Warner Bros. hefur tilkynnt að Wonder Woman 1984 verði frumsýnd samtímis í kvikmyndahúsum og á streymisveitu þeirra, HBO Max, þann 25. desember næstkomandi. Þetta eru enn ein tímamótin í sögu kvikmyndanna sem heimsfaraldurinn hefur ýtt undir. Hvað gæti þetta þýtt fyrir íslenskar kvikmyndir?

Netflix, RÚV og ZDF á bakvið ÓFÆRÐ 3

Netflix, RÚV og ZDF, ein stærsta sjónvarpsstöð Þýskalands, koma að framleiðslu þriðju syrpu þáttaraðarinnar Ófærð, sem nú kallast Entrapped. Tökur standa yfir.