„Mr. Skallagrímsson“ er málið

Dagur Kári og Benedikt Erlingsson skrifa undir samning í Kaupinhafn.
Dagur Kári og Benedikt Erlingsson skrifa undir samning í Kaupinhafn.

Fjölmiðlar, þar á meðal Klapptré, hafa sagt frá fyrirætlunum Benedikts Erlingssonar og Dags Kára um kvikmyndun Egils sögu. Í ljós hefur komið að um er að ræða kvikmynd fyrir sjónvarp sem byggð verður á einleik Benedikts, Mr. Skallagrímsson.

Benedikt upplýsti þetta í Síðdegisútvarpi Rásar 2 í dag. Likt og í einleiknum mun Benedikt fara með öll hlutverkin. Verkið var hin mesta skemmtan og ekki að efa að Norðurlandameistararnir tveir í kvikmyndagerð rúlla þessu glæsilega upp.

Einnig verður að gefa Benedikt prik fyrir óvenju gott PR-stönt.

Í þessu sambandi rifjast upp þegar Friðrik Þór Friðriksson lét auglýsa í útvarpinu að nú færu fram tökur á Njálssögu á Þingvöllum og væri fólk beðið um að hafa varan á, jafnvel ekki vera að þvælast í þjóðgarðinum að nauðsynjalausu. Vakti þetta nokkra athygli og hugðu margir gott til glóðarinnar. Gott ef ekki bar á aukinni umferð á Þingvöllum þessa helgi þar sem fjölskyldur í sunnudagsbíltúr óku þvers og kruss í leit að ummerkjum um rándýra kvikmyndagerð.

Líkt og sjá má hér að neðan gekk Friðrik Þór enn lengra og sagði fullum fetum við Helgarpóstinn í júní 1979 að hann væri að undirbúa leikna mynd um Njálssögu.

helgarposturinn-fridrik-thor-brennunjalssaga

Myndin var svo sýnd í Háskólabíói 6. ágúst 1980 og vissulega var þetta kvikmyndun á Njálssögu, en semsagt í bókstaflegum skilningi. Hljómsveitin Þeyr flutti tónlistina á sviðinu í stóra salnum undir hinni 16 mínútna löngu mynd þar sem bókinni var flett uns kom að brennunni á Bergþórshvoli en þá var kveikt í bókinni.

Og reyndar var þetta hin fínasta mynd.

Rammi úr Brennu-Njálssögu Friðriks Þórs Friðrikssonar.
Rammi úr Brennu-Njálssögu Friðriks Þórs Friðrikssonar.
Klapptré
Klapptré
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri er Ásgrímur Sverrisson.

TENGT EFNI

NÝJUSTU FÆRSLUR