Sjötíu stelpur í 8. og 9. bekk spreyta sig á kvikmyndagerð í kvikmyndasmiðjunni Stelpur filma! sem nú stendur yfir á vegum RIFF í samstarfi við Skóla- og frístundasvið Reykjavíkurborgar.
RÚV greinir frá og þar segir einnig:
Smiðjan var fyrst haldin árið 2015 í tilefni af 100 ára kosningaréttarafmæli kvenna á Íslandi.
Á námskeiðinu er megináhersla lögð á að skapa öruggt rými fyrir stelpur til að opna á allar hugmyndir sínar og að allar hugmyndir og sköpun eigi rétt á sér. Engin er dæmd út frá frammistöðu, kynvitund, bakgrunni, uppruna, fjárhagslegri stöðu eða öðrum breytum.
Námskeiðið miðar einnig að því að rétta af kynjahallann í kvikmyndagerð á Íslandi. Margir samverkandi þættir gera það að verkum að stelpur eru ólíklegri til að prófa sig áfram í kvikmyndagerð og láta rödd sína heyrast. Á námskeiðinu fá stelpurnar næði til að þroska hæfileika sína og mynda tengsl við kvenkyns fyrirmyndir.
Meðal kennara á námskeiðinu eru Valdís Óskarsdóttir klippari, Margrét Jónasdóttir framleiðandi og Baltasar Kormákur leikstjóri.
Sjá nánar hér: Stelpur filma miðar að því að rétta af kynjahlutfallið
