Stockfish hátíðin fer fram í annað sinn í Bíó Paradís dagana 18.-28. febrúar næstkomandi. Opnunarmynd hátíðarinnar er The Diary of a Teenage Girl og teiknarinn Sara Gunnarsdóttir sem gerði teikningar í myndinni verður gestur hátíðarinnar.
Myndin gerist í San Francisco á áttunda áratugnum og segir frá hinni 15 ára Minnie Goetz sem er upptekin af kynlífi og verður heltekin af kærasta móður sinnar eftir að hún sefur hjá honum. Minnie hefur áhuga á að vera teiknari og er Sara í stóru hlutverki í myndinni því teikningar hennar birtast mikið á skjánum samhliða leiknum og setja mark sitt á myndina. Marielle Heller leikstýrir myndinni og var hún nýlega tilnefnd til DGA-verðlauna (Directors Guild of America). Með aðalhlutverk fara Kristen Wiig, Alexander Skarsgård og nýstirnið Bel Powley sem hefur vakið mikla athygli fyrir leik sinn í myndinni.
Sara Gunnarsdóttir
Myndin var frumsýnd á Sundance kvikmyndahátíðinni í fyrra og hefur unnið til margra verðlauna.
Jóhann Jóhannsson gestur hátíðarinnar
Tónskáldið Jóhann Jóhannsson verður sérstakur gestur Stockfish hátíðarinnar að þessu sinni. Jóhann hefur unnið til fjölda verðlauna fyrir tónlist sína í kvikmyndum, en hann hlaut m.a. Golden Globe verðlaun árið 2015 fyrir tónlist sína í myndinni The Theory of Everything. Tilnefningar til annarra verðlauna hrannast inn og má þess geta að hann er bæði tilnefndur til Bafta-verðlauna og Óskarsverðlauna árið 2016 fyrir tónlist sína í myndinni Sicario.
Þegar hefur verið tilkynnt um nokkrar aðrar myndir á hátíðinni, meðal annars Son of Saul sem tilnefnd er til Óskars sem besta erlenda myndin og Victoria sem verðlaunuð var á síðustu Berlínarhátíð. Lesa má um myndirnar hér.
Sjá nánar hér: Opnunarmynd hátíðarinnar: The Diary of a Teenage Girl – Stockfish Film Festival
