spot_img
HeimNý verk Þáttaröðin TROM frumsýnd á Viaplay 13. febrúar

[Kitla] Þáttaröðin TROM frumsýnd á Viaplay 13. febrúar

-

Þáttaröðin Trom verður frumsýnd á efnisveitunni Viaplay þann 13. febrúar. Kitla verksins er komin út. REinvent Studios í Danmörku framleiðir þættina í samvinnu við Kyk Pictures í Færeyjum og Truenorth á Íslandi.

Segir á vef RÚV:

Þættirnir, sem eru sex talsins, verða frumsýndir á streymisveitunni Viaplay 13. febrúar og í færeyska ríkissjónvarpinu 17. febrúar næstkomandi. BBC hefur orðið sér úti um sýningarréttinn að þáttaröðinni sem gerist í Færeyjum.

Trom byggir á bókum færeyska rithöfundarins Jógvans Isaksen um rannsóknarblaðamanninn Hannis Martinsson. Í þáttunum rannsakar Martinsson andlát dýraverndunarsinna sem virðist hafa verið myrtur á meðan grindhvaladrápi stendur í eyjunum.

Það eru danski leikstjórinn Kasper Barfoed og sá íslenski Davíð Óskar Ólafsson sem leikstýra þáttunum. Davíð var framleiðandi og einn leikstjóra þáttanna Brot sem sýndir voru á RÚV haustið 2019.

Færeyingurinn Torfinnur Jákupsson skrifaði handritið en aðalhlutverk eru í höndum dönsku leikaranna Ulrich Thomsen og Mariu Rich og þess færeyska Olafs Johannessen.

Helene Aurø sölu- og markaðsstjóri REinvent kveðst bæði glöð og spennt yfir aðkomu BBC og kveðst hlakka til að heyra viðbrögð breskra sjónvarpsáhorfenda.

Um tíma stóð til að færa alla framleiðslu og TROM til Íslands vegna vandkvæða við opinbera fjármögnun í Færeyjum. Um það bil fjórar milljónir danskra króna þurfti svo hægt væri að hefja tökur þar.

Helgi Abrahamsen, umhverfis-, iðnaðar- og viðskiptaráðherra Færeyja sneri við blaðinu eftir að hafa sagt að útlokað væri að opna fjárhirslur ríkisins fyrir hvaða áhugaverða verkefni sem væri.

HEIMILDruv.is
Klapptré
Klapptré
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri er Ásgrímur Sverrisson.

NÝJUSTU FÆRSLUR