Ásdís hefur á undanförnum 15 árum gert margar heimildamyndir um mismunandi þætti íslenskrar menningararfleifðar.
Súðbyrðingur: saga báts (2011) fjallar um fjóra menn sem endursmíða bát sem hafði fúnað í grasi í Reykhólasveit. Smíð þessa báts er leiðarhnoð í frásögn af þróun súðbyrðingsins á Norðurlöndum. Haffærni þessara skipa, ásamt kunnáttu í siglingum, gerðu norrænum mönnum kleift að halda upp fljót Rússlands, sem og vestur um haf um Miðjarðarhafið, hvort sem var til verslunar, rána, eða landkönnunar.
Skjól og skart – handverk og saga íslensku búninganna (2017) er um handverk, menningarsögu og menningarpólitík. Hópur kvenna tekur þátt í námskeiði að sauma á sig íslenska búninga frá 20. öld. Við saumaskapinn ræða konurnar um hvað fær þær til þess að leggja þessa vinnu á sig og hvað búningarnir þýða fyrir þær. Út frá samræðunum spinnast þræðir sem raktir eru frekar um sögu búninganna; hvort sem um pólitískar yfirlýsingar er að ræða á hinni rómantísku nítjándu öld eða hvort taka megi upp nýjan hátt að bera þá á okkar dögum, sem er ekki vel séð af öllum.
Gósenlandið – íslensk matarhefð og matarsaga (2019) fjallar um íslenska matarhefð og þær breytingar sem hafa átt sér stað í matarsögu Íslendinga. Matargerð á Íslandi einkenndist af skorti; salt vantaði, brenni vantaði, korn vantaði, flest það sem nóg var af hjá nágrannaþjóðum. En engu að síður hefur þjóðin sem byggði landið fundið leiðir til að bæta úr skortinum.
Milli fjalls og fjöru (2021) segir frá skógum Íslands, skógeyðingu og skógrækt. Sögumenn eru vísindamenn, fræðimenn og bændur. Sagan hefst á míósen-tíma þegar Norðurálfa var þakin skógi, sem síðar myndaði surtarbrandslögin. Á nútíma eftir ísöld hófst jarðrof sem jókst til muna eftir að landnámsmenn komu og ruddu burt skógi til að skapa tún og beitarlönd fyrir skepnur sínar og nýttu skóginn til kolagerðar í járnvinnslu. Fjallað er um skógrækt 20. aldar til hinnar 21. þegar skógrækt verður æ nauðsynlegri til að sporna við hamfarahlýnun.
Tímar tröllanna (2022) er um tröll á ýmsum tímum – frá upphafi heims til nútíma nettrölla. Tröll hafa fylgt mannkyni í goðsögum og raunverulegri sögu, allt eftir því hvaða skilningur var settur í orðið á hverjum tíma – segir í kynningu. Tröllin eru hluti af íslenskri menningu og birtast í rituðum sögum, lagabókum og munnlegum arfi. Sögulega séð hafa tröllin staðið fyrir fólk, sem stendur utan samfélagsins og er því hættulegt eða er innan vébanda þess, en sýnir andfélagslega hegðun. Þá tákna tröllin líka ógnir þær sem að okkur steðja og eru oft handan skilnings okkar.
Nýjasta verk Ásdísar er Frá ómi til hljóms (2025). Í myndinni er fjallað um breytingar sem urðu í íslensku tónlistarlífi á 19. öld — frá þjóðlegri hefð til „hins nýja söngs“. Klapptré ræddi við Ásdísi þegar myndin var frumsýnd á Skjaldborg í fyrra og má skoða viðtalið hér að neðan:
