Kvikmyndin Víti í Vestmannaeyjum, sem byggir á samnefndri bók eftir Gunnar Helgason verður frumsýnd 9. mars næstkomandi. Stikla myndarinnar hefur verið gerð opinber.
Víti í Vestmannaeyjum er þroskasaga Jóns sem fer á sitt fyrsta knattspyrnumót í Vestmannaeyjum. Þar þarf Jón að takast á við
sjálfan sig og aðra, bæði innan vallar sem utan.
Jóhann Ævar Grímsson, Otto Geir Borg og Gunnar Helgason skrifa handrit og leikstjórn er í höndum af Braga Þórs Hinrikssonar.
Samhliða framleiðslu kvikmyndarinnar verða þróaðir og framleiddir sex sjónvarpsþættir sem einnig eru byggðir á bókinni og hefur RÚV tryggt sér sýningarréttinn á þeim. Level K dreifir hvoru tveggja á heimsvísu og hefst kynning erlendis snemma á næsta ári.
Sagafilm sem framleiðir kvikmyndina, fékk Hannes Þór Halldórsson landsliðsmarkmann til liðs við sig við gerð kynningarstiklu fyrir myndina. Hannes Þór sem að öllum líkindum spilar fyrir íslenska landsliðið á heimsmeistaramótinu næsta sumar í Rússlandi, var fastráðinn leikstjóri í fullu starfi hjá Sagafilm árin 2012 og 2013, áður en hann hóf atvinnuferil í fótbolta. Hann spilar í dag fyrir Randers í Danmörku.
