Heimildamyndin 15 ár á Íslandi eftir Jón Karl Helgason verður frumsýnd í Bíó Paradís þann 22.mars næstkomandi. Myndin fylgist með lífi taílenskrar fjölskyldu á Íslandi síðastliðin 15 ár.
Myndinni er svo lýst:
Það krefst hugrekkis að flytja á nýjar og ókunnar slóðir. Fyrir fimmtán árum fluttist taílensk fjölskylda til Íslands til að leita að betra lífi en elsta dóttirin varð eftir í Taílandi. Fylgst er með daglegu lífi fjölskyldunnar, baráttunni við að aðlagast íslensku samfélagi og þegar mikilvægum markmiðum hefur verið náð.
![](https://i0.wp.com/klapptre.is/wp-content/uploads/2017/03/15-ár-á-íslandi-plakat.jpg?resize=682%2C960&ssl=1)
Jón Karl segir markmið myndarinnar meðal annars að opna huga Íslendinga fyrir lífsbaráttu innflytjenda og opna áhorfendum sýn inní framandi menningarheim Taílendinga hér á landi, mismunandi trúarbrögð, dans og tónlistarhefð, vinna á fordómum gegn fólki af öðrum uppruna og auka þannig þekkingu og virðingu milli ólíkra menningarheima.
Stiklu verksins má sjá hér að neðan.