Börkur Sigþórsson mun leikstýra kvikmyndinni Mules fyrir RVK Studios og hefjast tökur síðar á árinu. Variety skýrir frá þessu á vef sínum.
Mules gerist í kjölfar hrunsins og fjallar um vel stæðan lögfræðing og bróður hans sem er á skilorði. Þeir ákveða að smygla verulegu magni kókaíns inní landið en þegar burðardýrið veikist við komuna til landsins og getur ekki afhent dópið lenda bræðurnir í mikilli klemmu.
Variety hefur eftir Agnesi Johansen framleiðanda hjá RVK Studios að verið væri að vinna að samframleiðslusamningi við sænska framleiðslufyrirtækið Tre Vanner og sölufyfyrirtækið Svensk filmindustri.
“Þó sagan gerist á Íslandi og verður á íslensku mun hún hafa sterka alþjóðlega skírskotun og verður að hluta tekin erlendis,“ segir Agnes við Variety.
Börkur hefur unnið við auglýsingagerð í mörg ár og meðal annars unnið fyrir stóra kúnna á borð við Nike, Honda og The Guardian. Hann skrifaði og leikstýrði stuttmyndinni Skaða (Come to Harm) sem meðal annars hlaut Edduverðlaunin 2012.
Sjá nánar hér: CANNES: Iceland’s RVK Studios to Develop Thriller ‘Mules’ (EXCLUSIVE) | Variety.
Sjá stiklu fyrir Skaða hér:
