Hjartasteinn vann til þrennra verðlauna á lokakvöldi Premiers Plans-kvikmyndahátíðarinnar í Angers í Frakklandi sl. sunnudag, en hátíðin var haldin í 28. sinn. Myndin hlaut aðalverðlaunin, áhorfendaverðlaunin og verðlaun ungu dómnefndarinnar.
Morgunblaðið skýrir frá og bætir við:
Samkvæmt upplýsingum frá Antoni Mána Svanssyni, framleiðanda myndarinnar, var um að ræða frumsýningu myndarinnar í Frakklandi. „Þetta er einstaklega góð byrjun fyrir franska dreifingaraðila myndarinnar þar sem myndin vann ekki eingöngu heiðurinn af þremur stærstu verðlaununum heldur hlaut einnig 70.000 evrur virði af stuðning fyrir markaðssetningu og kynningu myndarinnar í Frakklandi,“ segir Anton Máni. Við byrjun árs var hún frumsýnd í Bandaríkjunum á kvikmyndahátíðinni í Palm Springs. Hún fer fljótlega í almennar sýningar þar í landi sem og Noregi, Svíþjóð og Frakklandi. „Alþjóðlegur söluaðili myndarinnar, Films Boutique, mun hafa markaðssýningu á myndinni næst á kvikmyndahátíðinni í Berlín í febrúar,“ segir Anton Máni og tekur fram að vonandi verði í framhaldinu hægt að ganga frá fleiri samningum þar.
Sjá nánar hér: Hjartasteinn fær þrenn verðlaun í Frakklandi
