RIFF 2020 verður með breyttu sniði

RIFF hátíðin verður að mestu leyti haldin á netinu í ár, en þó fara bransadagar fram í Norræna húsinu og í samræmi við reglur um sóttvarnir. Hátíðin verður sett þann 24. september næstkomandi og stendur til 4. október, en áformað er að sýna evrópskar kvikmyndir fram eftir hausti á sérstökum þemavikum og byggja brú yfir til Evrópsku kvikmyndaverðlaunanna sem eiga að fara fram í Hörpu í desember.

Þetta kemur fram í fréttatilkynningu frá hátíðinni:

„Það er með sannri ánægju sem við tökumst á við þessa áskorun og færum RIFF í glæsilegan nýjan búning með því að færa gestum hágæða kvikmyndir heim í stofu. Með þessu móti munu enn fleiri kvikmyndaunnendur um land allt geta notið vandaðra kvikmynda. Auk þess sem hægt verður að nálgast á vefnum margt fleira fróðlegt t.a.m. spurt og svarað með leikstjórum, umræður og fleira slíkt,“ segir Hrönn Marinósdóttir stjórnandi hátíðarinnar.

Þá verða ýmsir viðburðir á dagskrá sem munu samræmast þeim reglum sem í gildi verða í samfélaginu er líður að hátíðinni sem hefst þann 24. september næstkomandi.

Þegar hefur verið ákveðið að Bransadagar munu fara fram í Norræna húsinu og fleiri covid vænir viðburðir verða á dagskránni auk þess sem barnadagskrá með kennsluefni verður í boði fyrir alla skóla landsins.

Brú yfir til EFA

Dagskrá hátíðarinnar verður að vanda vegleg, fjölbreytt og í takt við umræðuna í samfélaginu. Hinn þekkti dagskrárstjóri Frédéric Boyer fer fyrir dagskrárnefnd RIFF í ár. Hann hóf feril sinn á vídeóleigu í París og er í dag listrænn stjórnandi Tribeca kvikmyndahátíðarinnar í New York og Les Arcs European Film Festival sem eru meðal þekktustu kvikmyndahátíða heims. Hann hefur einnig verið aðal dagskrárstjóri Director´s Fortnight hluta kvikmyndahátíðarinnar í Cannes.

Áhersla hefur verið lögð á að sýna vandaðar, evrópskar kvikmyndir á hátíðinni og verður því fylgt sérstaklega eftir í ár í tilefni þess að í desember verða EFA Evrópsku kvikmyndaverðlaunin veitt í Hörpu. Ætlunin er að byggja brú yfir til EFA með því að sýna myndir fram í desember þegar verðlaunin verða veitt og stendur RIFF því yfir í um þrjá mánuði í ár.

„Það er mikill heiður að því að verðlaunin verði veitt hérlendis og gefur þeim sem starfa hér í kvikmyndageiranum og okkur hjá RIFF byr undir báða vængi. Af þessu tilefni munum við gera evrópskri kvikmyndagerð enn hærra undir höfði með því að skipuleggja sérstakar þemavikur fram eftir hausti undir merkjum RIFF. Þetta er spennandi tækifæri til að leyfa hátíðinni að lifa lengur inn í haustið og geta sýnt enn fleiri kvikmyndir,“ segir Hrönn.

Dagskráin verður gerð opinber smám saman og í heild þegar líða tekur á september. Aðgöngumiði á hátíðina veitir aðgang að fjölda kvikmynda sem hægt verður að nálgast á notendavænu formi á þar til gerðu vefsvæði. Um er að ræða sama vefviðmót og notað er á fjölda þekktra kvikmyndahátíða m.a. Copenhagen Pix, Locarno Film Festival í Sviss og Sundance kvikmyndahátíðinni.

Fyrirkomulag varðandi miðasölu verður kynnt nánar síðar.

Athugasemdir

álit

Um höfundinn
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri og ábyrgðarmaður er Ásgrímur Sverrisson.

Tengt efni