Sýningar á þáttaröðinni Stella Blómkvist hefjast á Sundance Now streymisveitunni á morgun, 31. janúar, en veitan nær til Bandaríkjanna, Kanada, Bretlands, Ástralíu og Nýja-Sjálands. Þá eru sýningar á Lói – þú flýgur aldrei einn hafnar í norskum kvikmyndahúsum og fer myndin vel af stað þar í landi.
Vefurinn Fancarpet fjallar um Stellu og þar segir einnig að Síminn, upphaflegur sýnandi þáttanna, hafi þegar pantað aðra seríu.
Sýningar á Lói – þú flýgur aldrei einn hófust í norskum bíóum um síðustu helgi og er myndin í sjöunda sæti, en hún er sýnd í 146 bíóum og er það víðtækasta dreifing allra kvikmynda þá vikuna. Samkvæmt Box Office Mojo nema heildartekjur myndarinnar á heimsvísu yfir fimm milljónum dollara. Hafa skal í huga að hér er eingöngu um tekjur af miðasölu að ræða og einnig er mögulegt að upplýsingar um tekjur vanti frá einstökum löndum.
