Ísland í fyrsta sinn meðal þátttökulanda í EFA Young Audience Award 6. maí

EFA Young Audience Award býður börnum á aldrinum 12-14 ára víðsvegar um Evrópu að gerast meðlimir í dómnefnd á kvikmyndahátíð. Valdar hafa verið þrjár evrópskar kvikmyndir sem börn á þessum aldri horfa á samtímis í yfir 36 löndum í Evrópu þann 6. maí og lýkur hátíðinni með verðlaunaafhendingu sem haldin er í Efurt í Þýskalandi sem sýnd er í beinni útsendingu á yaa.europeanfilmawards.eu. EFA Young Audience áhorfendaverðlaunin hafa farið fram frá árinu 2012 og tekur Ísland nú þátt í fyrsta skipti. Hátíðin fer fram þann 6. maí í Bíó Paradís. Gert er ráð fyrir að dagskrá hefjist kl. 9 og lýkur henni með verðlaunafhendingu sem hefst kl. 18 að íslenskum tíma.

Nefnd sem skipuð er af EFA tilnefnir þrjár evrópskar kvikmyndir sem ætlaðar eru aldurshópnum 12-14 ára. Fulltrúar dómnefndar í hverju landi um sig kynna niðurstöður dómnefndar í myndbandsupptöku sem sýnd er á verðlaunafhendingunni líkt og í Eurovision – evrópsku söngvakeppninni.

Leikstjórarnir Ása Helga Hjörleifsdóttir, Baltasar Kormákur og Ísold Uggadóttir stjórna umræðum eftir myndirnar og geta börnin í lok dags tekið þátt í kosningu þar sem besta myndin er valin. Deginum lýkur síðan með verðlaunaafhendingu þar sem börnin tilkynna niðurstöður kosninga hvers lands fyrir sig, í anda evrópsku söngvakeppninnar.

Börnin geta átt í samskiptum við önnur börn á deginum í löndum þar sem kvikmyndaverðlaunin fara fram í gegnum samfélagsmiðla og spjallrásir.

Markmið hátíðarinnar er að bjóða upp á einstakt tækifæri fyrir börn til þess að kynnast evrópskri kvikmyndamenningu og að sýna myndir sem endurspegla raunveruleika ungmenna um alla Evrópu. Eins er stefnt að því að kveikja áhuga barnanna á evrópskum sögum, fólki, menningu og hvetja til samkenndar, skilnings og þolinmæði.

Hægt er að skrá þátttakendur á aldrinum 12-14 ára fyrir 27. apríl n.k. með því að senda undirritað samþykki fyrir þátttöku á sigridur@kvikmyndamidstod.is.

Hægt er að nálgast eyðublaðið hér. Þar sem um alþjóðlegt samstarf er að ræða er eyðublaðið á ensku en starfsmenn KMÍ geta veitt aðstoð ef þörf er á.
Boðið verður upp á popp og drykki, ávexti og hádegisverð yfir daginn.

Myndirnar sem valdar hafa verið í ár eru:

Girl in Flight, eftir Söndru Vannuchi, er blíð, ógnvænleg, spennandi og tilfinningarík ferð ellefu ára stúlku frá Toskana, sem flýr að heiman og ver tveimur nóttum í sígaunabúðum í Róm.

Hér má sjá stiklu úr Girl in Flight.

Hobbyhorse Revolution fjallar um að hætta aldrei að gera það sem þú elskar: Fyndin og hjartnæm mynd um táninga og sársaukafullan uppvöxt þeirra, um leið og þau uppgötva eigin raddir og hæfileika við útreiðar og gerð hestaprika.

Hér má sjá stiklu úr Hobbyhorse Revolution.

Wallay fjallar um Ada, 13 ára strák sem býr einn með föður sínum í Frakklandi. Þegar faðirinn stendur úrræðalaus gagnvart hegðunarvanda Ada grípur hann til þess að senda hann til fjölskyldu þeirra í Burkina Faso.

Hér má sjá stiklu úr Wallay.

Athugasemdir

álit

Um höfundinn
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri og ábyrgðarmaður er Ásgrímur Sverrisson.