Tinna Hrafnsdóttir sigraði pitch-keppni Shorts TV sem lauk í Cannes í dag. Aðstandendur stuttmynda víðsvegar að gátu mælt fram hugmynd sína og almenningur kaus síðan þá bestu á netinu.
Þetta er í þriðja sinn sem keppnin er haldin og jafnoft hafa íslenskar konur borið sigur úr býtum; Eva Sigurðardóttir 2014, Anna Sæunn Ólafsdóttir 2015 og Tinna nú, en verkefni hennar kallast Katharsis. Verðlaunafé nemur fimm þúsund evrum eða rúmu sjö hundruð þúsund krónum og verður notað til að framleiða myndina.
