Sérstök ástæða er til að vekja athygli á úkraínsku kvikmyndinni The Tribe (Plemya) sem verður frumsýnd í Bíó Paradís á morgun föstudag.
Myndin fjallar um heyrnarlausan ungling sem fer í heimavistarvistarskóla fyrir heyrnarlausa og gengur þar inn í framandi samfélag. Hann verður ástfanginn af einum meðlimi hópsins og fellur smátt og smátt í þá gryfju að brjóta allar þær óskrifuðu reglur sem hópurinn hefur sett sér.
Þetta er fyrsta mynd leikstjórans Myroslav Slaboshpytskiy en hún sópaði að sér verðlaunum á gagnrýnendaviku kvikmyndahátíðarinnar í Cannes og hafa gagnrýnendur víðsvegar um heim staðið á öndinni yfir myndinni, eins og sjá má til dæmis hjá Rotten Tomatos, Variety, IndieWire og The Hollywood Reporter.
The Tribe er án tals og er eingöngu talað táknmál í myndinni. Enginn texti er heldur við myndina, en leikstjórinn vill meina að ekki þurfi tal til að skilja ást og hatur.
