Sigmar Vilhjálmsson forsvarsmaður Konunglega kvikmyndafélagsins, rekstaraðila sjónvarpsstöðvanna Miklagarðs og Bravó, segist bjartsýnn á að hlutafjáraukningu félagsins ljúki sem fyrst. Félagið sagði öllum starfsmönnum upp í dag eftir um tveggja mánaða rekstur.
„Við viljum ekki skuldsetja félagið. Það sem hefur riðið öllum fjölmiðlum að fullu í sögunni er einmitt skuldsetning. Það er alveg ljóst mál að farið var í þessa vegferð af áhuga og ástríðu. Ef maður er farinn að sligast af skuldum, þá er ástríðan horfin úr verkefninu og er því betra heima setið,“ segir hann í samtali við mbl.is.
„Félagið er sáralítið skuldsett og við viljum halda því þannig.“
Í viðtalinu ræðir hann um stöðuna og horfurnar framundan. Ætlunin sé að sækja meira hlutafé og stöðvarnar verði áfram í loftinu.
Sigmar segir að framtíðarsýn félagsins sé skýr. Áhugaverðir tímar séu í vændum á fjölmiðlamarkaði og ætli félagið sér að vera virkur þátttakandi í þeim breytingum sem framundan eru.
„Við erum með ákveðna framtíðarsýn í okkar félagi sem auðvitað mun taka tíma að byggja upp og klára,“ segir hann. Þeir séu alls ekki að tjalda til einnar nætur.
Sjá nánar hér: „Viljum ekki skuldsetja félagið“ – mbl.is.
