Hross í oss var kosin kvikmynd ársins á Edduverðlaunahátíðinni sem haldin var fyrir fullum sal og í beinni útsendingu í Silfurbergi í Hörpunni í gærkvöldi. Hross í oss hlaut sex Eddur á hátíðinni, meðal annars fyrir leikstjórn, handrit og kvikmyndatöku. Málmhaus sópaði til sín verðlaunum og hlaut alls átta verðlaun, meðal annars fyrir klippingu, hljóð og tónlist.
Hross í oss kraftaverk
Friðrik Þór Friðriksson veitti verðlaununum fyrir bestu myndina viðtöku sem framleiðandi kvikmyndarinnar. Benedikt Erlingsson var ekki viðstaddur verðlaunaafhendinguna í kvöld þar sem hann er viðstaddur frumsýningu Hross í oss í Glasgow í Skotlandi.
Friðrik sagði í ræðu sinni að myndin væri eitt mesta kraftaverk í íslenskri kvikmyndasögu. „Af því að þetta var bara lítil mynd sem varð risastór,“ sagði hann og bætti við að myndin hafi verið seld víða um heim. Tilkynnt verði um 18 sölur á blaðamannafundi á morgun og átta sölur til viðbótar í á Nútímalistasafninu í New York (MoMA).
„Hún er að komast á stall með mest útbreiddustu kvikmyndum Íslandssögunnar og það er svo fallegt,“ sagði Friðrik.
Önnur helstu verðlaun
Ingvar E. Sigurðsson skoraði tvennu í leikaraverðlaununum og hlaut Edduna fyrir leik í aðalhlutverki í Hross í oss og aukahlutverki í Málmhaus. Þorbjörg Helga Þorgilsdóttir í Málmhaus var valin leikkona ársins í aðalhlutverki og Halldóra Geirharðsdóttir, einnig í Málmhaus, leikkona í aukahlutverki.
Ástríður 2 var valið leikið sjónvarpsefni ársins og titilinn sjónvarpsmaður ársins kom í hlut Boga Ágústssonar. Stuttmyndin Hvalfjörður og heimildarmyndin Hvellur unnu Edduna hvor í sínum flokki. Þá tóku áhorfendur Eddunnar þátt í símakosningu meðan á útsendingunni stóð og völdu sína uppáhaldssetningu úr íslenskri kvikmynd og varð setningin; Inn, út, inn, inn, út úr kvikmyndinni Með allt á hreinu, fyrir valinu.
Sigríður Margrét Vigfúsdóttir hlaut heiðursverðlaunin
Heiðursverðlaun ársins komu í hlut Sigríðar Margrétar Vigfúsdóttur, Sörmu, fyrir yfir tuttugu ára þrotlaust starf í þágu íslenskra kvikmynda á erlendri grund. Sarma er konan á bak við tjöldin, konan sem hefur í áraraðir verið potturinn og pannan í öllum styrkumsóknum íslenskra kvikmynda í stærstu kvikmyndasjóðum Evrópu. Þar hefur Sarma gegnt burðarhlutverki og það er að stórum hluta henni að þakka að íslenskar kvikmyndir hafa á síðustu tveimur áratugum náð þeim ótrúlega árangri að fá úthlutað um tveimur milljörðum króna, þar af alls 175 milljónum króna bara á síðasta ári.
Kynnir Eddunnar, Ólafía Hrönn Jónsdóttir, fór á kostum og spilaði meðal annars á þrjú hljóðfæri; gítar, flygil og trommur!
Eftirtalin verk og einstaklingar unnu til verðlauna á Eddunni 2014.
Heiðursverðlaun ÍKSA 2014
Sigríður Margrét Vigfúsdóttir
Kvikmynd ársins
Hross í oss
Leikið sjónvarpsefni ársins
Ástríður 2
Frétta- eða viðtalsþáttur ársins
Kastljós
Skemmtiþáttur ársins
Orðbragð
Menningar- eða lífstílsþáttur ársins
Djöflaeyjan
Heimildamynd ársins
Hvellur
Stuttmynd ársins
Hvalfjörður
Barnaefni ársins
Stundin okkar
Leikstjóri ársins
Benedikt Erlingsson – Hross í oss
Handrit ársins
Benedikt Erlingsson – Hross í oss
Sjónvarpsmaður ársins
Bogi Ágústsson
Leikkona ársins í aðalhlutverki
Þorbjörg Helga Þorgilsdóttir – Málmhaus
Leikari ársins í aðalhlutverki
Ingvar E. Sigurðsson – Hross í oss
Leikkona ársins í aukahlutverki
Halldóra Geirharðsdóttir – Málmhaus
Leikari ársins í aukahlutverki
Ingvar E. Sigurðsson – Málmhaus
Kvikmyndataka ársins
Bergsteinn Björgúlfsson – Hross í oss
Klipping ársins
Valdís Óskarsdóttir – Málmhaus
Hljóð ársins
Huldar Freyr Arnarson – Málmhaus
Tónlist ársins
Pétur Ben – Málmhaus
Leikmynd ársins
Gunnar Pálsson – Fólkið í blokkinni
Búningar ársins
Helga Rós Hannam – Málmhaus
Gervi ársins
Steinunn Þórðardóttir – Málmhaus
Brellur ársins
Jörundur Rafn Arnarson – Hross í oss
