Pistill Gríms er svohljóðandi:
Ég hvet kvikmyndagerðarfólk til að kjósa eftir eigin sannfæringu í kosningunum á laugardaginn og hafa það í huga hvað fráfarandi menningarráðherra, Lilja D. Alfreðsdóttir, hefur staðið fyrir á þessu kjörtímabili. Þrátt fyrir að hún hafi komið ýmsu góðu til leiðar, eins og 35% endurgreiðslu, háskólanámi í kvikmyndagerð, höfundarlaunum ofl, þá ber hún líka ábyrð á einum harðasta niðurskurði í sögu greinarinnar. Hún skar framlög til Kvikmyndasjóðs niður um 49% á árunum 2021-2025 og stefndi á að halda áfram að skera niður til ársins 2027. Það var ekki fyrr en að einstaklingar í bransanum byrjuðu að gagnrýna niðurskurðinn opinberlega og ræða við þingmenn sem að hlutirnir byrjuðu að þokast í rétta átt. Það var fjárlaganefnd Alþingis sem ákvað í sameiningu að stöðva þennan niðurskurð og bæta 300 milljónum í sjóðinn á næsta ári.
Ég bendi fólki á að kynna sér stefnu stjórnmálaflokkanna í þessum málum og taka upplýsta ákvörðun. Hér er hægt að horfa á pallborðsumræður með fulltrúum flokkanna þar sem m.a. er rætt um kvikmyndagerð: (https://klapptre.is/…/flestir-flokkanna-vilja-gera…/)(https://www.mbl.is/…/beint_kosningafundur_um_skapandi…/). Það eru margir góðir kostir í boði en almennt eru það vinstri- og miðjuflokkarnir sem að bera hag greinarinnar fyrir brjósti. Miðflokkurinn, Flokkur Fólksins og Lýðræðisflokkurinn eru ekki með menninguna ofarlega í sinni forgangsröðun eins og kemur vel fram á þessum fundum.
Þær tillögur sem að Lilja kynnti í vikunni lofa vissulega góðu fyrir framtíð íslenskrar kvikmyndagerðar. En það er stutt í kosningar og því verður að taka þeim með ákveðnum fyrirvara. Þessar tillögur/hugmyndir koma allar frá fagfélögum innan greinarinnar og mér hefði fundist skynsamlegra að bíða eftir næsta ráðherra, frekar en að gefa Lilju færi á að nýta sér þær í pólitískum tilgangi, þ.e. til að reyna að halda sér inni á þingi. Það er alls ekki víst að Lilja verði kosin inn á þing miðað við nýjustu kannanir og alls óvíst hvort að Framsóknarflokkurinn verði í næstu ríkisstjórn. Það eru því hverfandi líkur á því að Lilja verði menningarráðherra á næsta kjörtímabili, en hún er búin að gegna því embætti síðan 2017.
Ef ég á að gefa Sambandi íslenskra kvikmyndaframleðenda ráð þá myndi ég spara orkuna fram yfir kosningar og reyna að vinna þessum góðu tillögum brautargengi með nýjum menningarráðherra. Það er líf eftir Lilju.
