spot_img
HeimNý verk Verðlaunamyndin VELKOMINN ÁRNI frumsýnd í Bíó Paradís

[Stikla] Verðlaunamyndin VELKOMINN ÁRNI frumsýnd í Bíó Paradís

-

Heimildamyndin Velkominn Árni eftir Viktoríu Hermannsdóttur og Allan Sigurðsson var frumsýnd í Bíó Paradís í gær. Myndin segir sögu Árna Jóns Árnasonar sem vissi aldrei hver væri faðir sinn. Það var ekki fyrr en á áttræðisaldri sem hann komst óvænt að því hver faðir hans gæti hafa verið.

Myndin var sýnd á Skjaldborg í vor og hlaut þar áhorfendaverðlaunin. Hér má lesa umsögn um hana.

Vísir greinir frá frumsýningunni:

Upphaf sögunnar má rekja til þess að Bandaríkjamaðurinn David Balsam hafði samband við fjölmiðlakonuna Viktoríu Hermannsdóttur. Viktoría hafði þá nýlega gert þáttaröðina Ástandsbörn og hafði David samband í von um að hún gæti hjálpað honum að finna mögulegan bróður sinn á Íslandi. Einu upplýsingarnar sem hann hafði á milli handanna voru fæðingarárið 1945 og nafn móðurinnar.

Eftir að David hafði samband fór hún á fullt að grennslast fyrir um þennan mögulega bróður. Út frá því urðu þættirnir Á ég bróður á Íslandi? til. Þau fundu Árna Jón, sem var mögulega týndi bróðirinn, og hittust þeir út frá því.

Vildi vita meira
„Eftir að við fundum Árna vildi ég gera eitthvað meira en ég hafði aldrei gert heimildarmynd áður. Ég hafði samband við Allan sem var til í þetta verkefni með mér,“ segir Viktoría í samtali við Vísi. Úr varð myndin Velkominn Árni.

Í myndinni er fylgst með ferðalagi Árna til Bandaríkjanna. Þar hittir hann alla fjölskyldu mögulegs bróður síns og undirgengst DNA próf til að athuga hvort að hann sé í raun sá sem leitað var.

„Ég er svo glöð að hafa kynnst Árna því hann er svo ótrúlega skemmtilegur og einlægur. Hann er svo frábær og það hefur gefið okkur mikið að fá hann inn í okkar líf,“ segir hún um Árna.

Gaman að deila myndinni með öðrum
Gerð myndarinnar hefur átt hug þeirra Allans og Viktoríu í tæp fjögur ár á milli annarra verkefna. Myndin hlaut Einarinn, áhorfendaverðlaun Skjaldborgar 2022, sem er hátíð íslenskra heimildakvikmynda. „Það hefur verið ótrúleg upplifun að sýna myndina og deila henni með fólki,“ segir Viktoría.

HEIMILDVísir
Klapptré
Klapptré
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri er Ásgrímur Sverrisson.

NÝJUSTU FÆRSLUR