RIFF, alþjóðleg kvikmyndahátíð í Reykjavík, verður sett í 17. sinn þann 24. september næstkomandi og stendur til 4. október.
Vegleg kvikmyndadagskrá verður á riff.is þar sem öllum landsmönnum býðst að horfa jafnt á landi sem og sjó. Um 60 myndir verða sýndar á netinu og u.þ.b. 20 í Bíó Paradís og Norræna húsinu. Þær verður ekki hægt að sjá á netinu. Þau sem vilja horfa á netinu geta kynnt sér fyrirkomulagið hér.
Meðal mynda eru t.d. Nomadland í leikstjórn Chloe Zhao, sem á dögunum hlaut Gulljónið í Feneyjum. Zhao hlaut Gyllta lundann fyrir nokkrum árum fyrir mynd sína The Rider.
Opnunarmynd RIFF í ár er Þriðji póllinn, ný íslensk kvikmynd eftir Andra Snæ Magnason og Anní Ólafsdóttur. Hátíðinni verður lokað með frumsýningu á kvikmyndinni Á móti straumnum eftir Óskar Pál Sveinsson.
Sjá nánar um íslensku myndirnar hér.
Í Norræna húsinu mun fara fram bransadagskrá þar sem m.a. íslenskum kvikmyndagerðarmönnum gefst kostur á að kynna verk í vinnslu fyrir hinum alþjóðlega kvikmyndaheimi.
