Auglýsingaleikstjórarnir Samúel Bjarki Pétursson og Gunnar Páll Ólafsson hafa fest kaup á þriðjungshlut í Skot Productions ehf. Um er að ræða nýtt hlutafé í félaginu en áður áttu þau Hlynur Sigurðsson og Inga Lind Karlsdóttir félagið að fullu.
Vísir segir frá og vísar í tilkynningu frá félaginu:
Í tilkynningu segir að samhliða innkomu Samúels og Gunnars muni Skot taka að sér verkefni á sviði auglýsingagerðar fyrir sjónvarp og internet og byggja upp öfluga liðsheild á þeim vettvangi.
Skot hefur hingað til einbeitt sér að framleiðslu og þróun á sjónvarpsefni og er með nokkur verkefni á þróunarstigi í samvinnu við sjónvarpsstöðvarnar. Einnig festi Skot kaup á 35% í vefmiðlinum Nútímanum en Skot og Nútíminn hafa verið í samstarfi um nokkurt skeið um framleiðslu á sjónvarpsefni fyrir nutiminn.is.
Samúel og Gunnar hafa unnið sem leikstjórateymi í 16 ár. Þeir hafa unnið fyrir mörg stærstu fyrirtækin hér á landi sem og erlendis og jafnframt unnið til fjölda verðlauna fyrir bæði auglýsingar og tónlistarmyndbönd.
Sjá nánar hér: visir.is
