Barði Jóhannsson tónskáld er höfundur tónlistar við frönsku myndina De toutes nos forces eða The Finishers, eins og Klapptré sagði frá á síðasta ári. Myndin var frumsýnd í Frakklandi í gær en hefur áður verið sýnd á Toronto hátíðinni s.l. haust. Leikstjóri myndarinnar, Nils Tavernier, er sonur hins góðkunna Bertrand Tavernier.
Titillinn útleggst á íslensku sem Af öllum mætti. Sagan er um feðga, sonurinn er lamaður og bundin í hjólastól en vill keppa ásamt föður sínum í hinni árlegu þríþrautarkeppni Járnmanninum sem fram fer í Nice.
Með aðalhlutverk fara Jacques Gamblin, Alexandra Lamy og Fabien Héraud.
Eins og heyra má í stiklu myndarinnar hér fyrir neðan á Sigurrós einnig lag í myndinni.
