Alþjóðlega kvikmyndahátíðin í Toronto (TIFF) í Kanada er stærsta og jafnframt mikilvægasta kvikmyndahátíð Norður-Ameríku. Vinni O (Hringur) aðalverðlaunin á hátíðinni verður myndin sjálfkrafa hluti af forvali fyrir Óskarsverðlaunin 2025 en Rúnar var einmitt tilnefndur til þeirra árið 2006 fyrir Síðasta bæinn.
Ljósbrot verður sýnd í Centrepiece flokki hátíðarinnar sem einblínir á nýjar samtímamyndir eftir þekkta leikstjóra og á myndir sem skara fram úr á líðandi stundu.
Ljósbroti hefur vegnað vel á hátíðum allt frá því hún var heimsfrumsýnd á Cannes hátíðinni og hlotið fjögur alþjóðleg verðlaun. Myndin verður frumsýnd á Ísland þann 28. ágúst. Með aðalhlutverk fara Elín Hall, Katla Njálsdóttir, Mikael Kaaber, Baldur Einarsson, Gunnar Kristjánsson og Ágúst Wigum.
Myndin gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr.
Heather Millard, framleiðandi beggja myndanna, segir valið til marks um stöðu Rúnars í alþjóðlegri kvikmyndagerð. “Að eiga tvær myndir á hátíð af þessari stærðargráðu er auðvitað einstakt afrek. Cannes og Feneyjar eru stóra sviðið í Evrópu. Ljósbrot var opnunarmynd á Cannes og O (Hringur) er í aðalkeppni í Feneyjum. Við erum auðvitað orðlaus yfir þessari velgengni og viðurkenningum beggja mynda og nú að vera komin til Toronto sem er stóra sviðið í Norður Ameríku.”
Rúnar segir þetta viðurkenningu fyrir alla sem að verkunum komu sem og fyrir íslenska kvikmyndagerð. Hann hlakkar til að frumsýna myndirnar hér heima. “Við byrjum á Ljósbroti 28. ágúst og svo mun O (Hringur) fara í sýningar 5. september. Við erum að gera myndir fyrir íslenska áhorfendur, sem gerast í íslenskum veruleika. Til að mynda er það svo merkilegt hvað það er mismunandi á milli landa hvar fólk hlær. Við erum spennt að heyra hversu mikið Íslendingar hlæja og hvar.“
