Fjallað er um þetta í ScreenDaily. Þar kemur meðal annars fram að bæði munu halda áfram að reka sín eigin sjálfstæðu framleiðslufyrirtæki utan hins nýja samstarfs – Sara hjá S101 (sem hún rekur ásamt Hrönn Kristinsdóttur) og Grímar hjá Netop Films. Þau munu skoða hverju sinni hvaða verkefni henta best til að fara í gegnum Sarimar.
Þau segja: „Hugmyndafræði okkar er frekar einföld. Saman stöndum við sterk og myndum þannig regnhlíf fyrir fyrirtækin okkar og þau verkefni sem við erum að vinna saman og sitt í hvoru lagi. Sarimar Films er ekki bara fyrirtæki heldur hreyfing; samstarf okkar við fagfólk sem okkur þykir vænt um og viljum vinna áfram með. Við viljum virkja umfangsmikið tengslanet okkar betur, innanlands sem utan, í þágu verkefna okkar og byggja á reynslu okkar í þróun, fjármögnun og framleiðslu kvikmyndaðs efnis.
200 Kópavogur í leikstjórn Gríms Hákonarsonar, sem einnig skrifar handrit, hefur þegar fengið handritsstyrk frá Kvikmyndamiðstöð Íslands. Stefnt er á að hefja tökur síðsumars 2025.
Sagan gerist á sjöunda áratugnum og fjallar um tvo bræður sem eru meðal fyrstu íbúa nýs bæjar á Íslandi. Dag einn biður eldri bróðirinn þann yngri um greiða sem á eftir að hafa djúp áhrif á líf þeirra beggja.
„Þetta er í raun þroskasaga yngri bróðurins. Það að sýna varnarleysi karla er eitthvað sem alþjóðlegir áhorfendur geta tengt við,“ segir Sara og Grímur bætir við: „Ef fólki líkaði við Hrúta og kímnigáfu Gríms mun því einnig líka við þessa mynd.“
Sara vinnur nú að frágangi kvikmyndarinnar Cornucopia með Björk hjá fyrirtæki sínu S101. Einnig er í þróun næsta verkefni Valdimars Jóhannssonar. Grímar og Netop Films fara í tökur á kvikmyndinni Eldarnir í leikstjórn Uglu Hauksdóttur síðsumars.
