Joe Bini og Maya Daisy Hawke eru heiðursgestir
Heiðursgestir hátíðarinnar í ár eru Joe Bini og Maya Daisy Hawke. Þau eru margverðlaunaðir klipparar, kenna meistarafyrirlestra og skapa ‘live cinema’ kvikmynda- og fyrirlestraverk. Auk meistaraspjalls með Maya og Joe verða sýndar tvær heimildamyndir sem þau hafa klippt á ferlinum, annarsvegar Navalny í leikstjórn Daniel Roher og hinsvegar Grizzly Man í leikstjórn Werner Herzog.
Fyrstu verk Reynis Oddssonar
Kvikmyndasafnið mun standa fyrir sýningum á völdum heimildastuttmyndum eftir Reyni Oddsson. Reynir Oddsson lærði leiklist og kvikmyndagerð í Bandaríkjunum og London. Þegar hann kom heim úr námi mætti hann með nýbylgjuhugmyndir inn í íslenska kvikmyndaiðnaðinn. Fyrstu myndinni hans, Slys (1962), var mikið hampað fyrir nýstárlega fagurfræði. Ein merkasta mynd íslenskrar kvikmyndasögu er Morðsaga (1977), þar sem Reynir sótti mikinn innblástur til frönsku nýbylgjunnar og reif í sig heimilislíf íslenskra efri stétta með markvissri fagurfræði og krefjandi kynjapólitík. Myndir Reynis slógu nýjan og ferskan tón sem átti eftir að óma á sjöunda og áttunda áratugnum og breyta miklu í efnistökum og fagurfræði íslenskra kvikmynda, segir í kynningu frá Kvikmyndasafninu.
Palestínufókus
Þá verður boðið upp á vel valdar heimildastuttmyndir frá Palestínu.
