Heimir Bjarnason vinnur nú að fyrstu bíómynd sinni, Þrot. Myndin er á lokastigum eftirvinnslu og er stefnt að því að hún komi út næsta vor.
Að sögn Heimis gerist myndin í íslensku smábæjarsamfélagi sem er heltekið af nýjasta pýramídasvindlinu og hvaða áhrif það hefur á líf þeirra sem sagan fjallar um. Tökur fóru að mestu leyti fram á Hvolsvelli og Suðurlandsundirlendinu síðsumars 2018.
Bára Lind Þórarinsdóttir, Anna Hafþórsdóttir og Bjarni Snæbjörnsson fara með helstu hlutverk ásamt Pálma Gestssyni og Guðrúnu S. Gísladóttur. Kvikmyndataka er í höndum Nicole Elizabeth Goode.
Heimir nam leikstjórn við Prague Film School og útskrifaðist 2016. Hann hefur síðan unnið að ýmsum verkefnum.
„Ég hef haft áhuga á kvikmyndagerð frá því að ég man eftir mér. Ég gerði mínu fyrstu stuttmynd um 9 ára aldur á Sony Ericsson síma og þegar ég var 12 ára senti ég Tarantino mitt fyrsta handrit á ensku. Hann svaraði því með handskrifuðu bréfi sem ég get alltaf gripið til þegar mig vantar smá boost og missa ekki dampinn í kvikmyndagerðinni. Ég hef leikstýrt um 12 stuttmyndum á seinustu 10 árum. Hugmyndin að Þroti varð fyrst til í menntaskóla þar sem ég stofnaði nefnd með það markmið að framleiða mynd í fullri lengd. Því miður tókst það ekki en seinustu fimm ár hafa farið í þróun og fjármögnunarferli fyrir myndina. Svo komst ég loksins í tökur í fyrra með almennilegt crew og nógu mikið budget til að gera myndina eins og ég vildi hafa hana,“ segir Heimir.
