Evrópustofa og Bíó Paradís efna á ný til Evrópskrar kvikmyndahátíðar í samstarfi við Films on the Fringe og bjóða brot af því besta í evrópskri kvikmyndagerð allan hringinn dagana 15.-26. maí.
Þetta er annað árið í röð sem Evrópsk kvikmyndahátíð fer hringinn, en farið verður á sex staði víðsvegar um land.
Evrópulöndin eru stærstu samstarfsaðilar Íslands í kvikmyndagerð en fjölmargar íslenskar kvikmyndir hafa notið stuðnings MEDIA áætlunar Evrópusambandsins. Verkefninu er ætlað að bjóða upp á kvikmyndalist án endurgjalds og fyrir alla. Boðið verður upp á kvikmyndafræðslu fyrir börn, undir styrkri leiðsögn Oddnýjar Sen kvikmyndafræðings, en verkefninu er ætlað að breiða út kvikmyndafræðslu sem fer fram allt árið um kring í Bíó Paradís.
Tilgangur verkefnisins er að kynna og breiða út evrópska menningu, en framtakinu var vel tekið síðasta vor. Hringferðin er unninn í samstarfi við verkefnið Films on the Fringe sem styrkt er af Creative Europe, í þeim tilgangi að bjóða upp listrænar gæðakvikmyndir í Norður-Evrópu.
Á þeim stöðum þar sem ekki er kvikmyndahús verða myndirnar sýndar með fullkomnum stafrænum færanlegum sýningarbúnaði, í bestu mögulegu hljóð- og myndgæðum.
Ókeypis er á allar myndir hátíðarinnar.
Sýningartímar eru kl 16:00, 18:00 og 20:00 á hverjum stað og dagsetningar eru sem hér segir:
15. maí – Egilsstaðir
16. maí – Höfn í Hornafirði
19. maí – Akranes
21. maí – Ísafjörður
23. maí – Akureyri
26. maí – Selfoss
Á Facebook síðu hátíðarinnar má skoða dagskrána á hverjum stað.
