Heimildamynd Ólafs Sveinssonar, Horfinn heimur, er um þær sláandi breytingar sem urðu á hálendinu kringum Snæfell með tilkomu Kárahnjúkavirkjunar.
Myndin er að mestu tekin í fimm daga gönguferð Ferðafélagsins Augnabliks síðsumars 2006, skömmu áður en byrjað var að safna vatni í Hálslón Kárahnjúkavirkjunar.
Segir í kynningu:
Í myndinni eru viðtöl við vísindamenn, sem voru að hluta með í för, og héldu uppi harðri en málefnalegri gagnrýni á virkjunina og byggingu hennar, en einnig við yfirverkfræðing Kárahnjúkavirkjunar og þann stjórnmálamann á Miðausturlandi sem barðist hvað lengst og harðast fyrir byggingu hennar og álver í Reyðarfirði.
Stutt heimildamynd Ólafs, Enginn veit hvað átt hefur fyrr en misst hefur, er sýnd á undan, en hún spannar enn lengra tímabil, eða 2003 –2021. Í henni eru ljósmyndir frá fjölmörgum stöðum sem sárafáar eða jafnvel engar myndir hafa sést frá áður, en voru hluti af stærsta ósnortna víðerni Evrópu, áður en Kárahnjúkavirkjun var byggð. Hún er klippt saman úr úrvali ljósmynda sem höfundurinn Ólafur Sveinsson safnaði saman frá fjölmörgum ferðalöngum og atvinnuljósmyndurum. Kjartan Sveinsson hljómborðsleikari SigurRósar samdi tónlist.
Þessar tvær heimildamyndir sýna áhrifasvæði Kárahnjúkavirkjunar á hálendinu við Snæfell, norðaustan Vatanajökuls, betur, bæði fyrir og eftir virkjun, en áður hefur sést. Það er síðan áhorfenda að dæma um hvort þeim finnst álver Alcoa í Reyðarfirði og störfin sem urðu þar til, réttlæta eyðileggingu náttúrunnar á öræfunum kringum Snæfell eða ekki.
Ólafur segir jafnframt:
Það er engu líkara en að helstu auðlindir Íslands séu á brunaútsölu í augnblikinu. Stærstan hluta fiskveiðiauðlindarinnar fá svokallaðir sægreifar fyrir lítið. Rafmagn fyrir stóriðju var og er selt á spottprís, auk þess sem skattareglur gefa fyrirtækjunum færi á að flytja hagnaðinn nánast skattlaust úr landi. Það sama á við um firðina sem norskir milljarðamæringar fá nánast endurgjaldslaust fyrir laxeldi. Og peningamenn standa í röðum eftir að byggja vindmyllugarða með vindmyllum sem eru allt að 200 metra háar, með spaðana í hæstu stöðu víða um land.
Margmiðlunarsýning sem gerð hefur verið í samstarfi við Landvernd og náttúruverndarsamtök á landsbyggðinni verður sett upp í Bíó Paradís meðan á sýningu heimildamyndanna stendur. Á sýningunni verða níu stórar ljósmyndir (1,20 x 1,60 metrar) af áhrifasvæði Kárahnjúkavirkjunar á hálendinu, bæði fyrir og eftir virkjun, auk nokkurra smærri mynda. Snertiskjár með Náttúrukorti Landverndar,sem er lifandi vefsjá sem sýnir staði sem fyrirhugað er að nýta til orkuframleiðslu eða raska á annan hátt, er hluti af sýningunni auk tveggja stuttmynda sem sýndar verða á stórum sjónvarpsskjá. Önnur þeirra, Ómar, er um baráttu Ómars Ragnarssonar, en hin kallast Ferðafélagið Augnablik.
