HeimNý verkSjónvarpsmyndin SÓTTKVÍ sýnd páskadag á RÚV: Einmanaleikinn gerir fólk ringlað og hvatvíst

Sjónvarpsmyndin SÓTTKVÍ sýnd páskadag á RÚV: Einmanaleikinn gerir fólk ringlað og hvatvíst

-

Sjónvarpsmyndin Sóttkví verður sýnd á páskadag, 4. apríl, á RÚV. Reynir Lyngdal leikstýrir eftir handriti Birnu Önnu Björnsdóttur og Auðar Jónsdóttur. Elma Lísa Gunnarsdóttir, Birgitta Birgisdóttir, Lára Jóhanna Jónsdóttir og Hilmar Guðjónsson fara með helstu hlutverk.

Sóttkví gerist í Reykjavík í mars 2020, í fyrstu bylgju COVID-19. Vinkonurnar Lóa, Hekla og Fjóla þurfa að fara í tveggja vikna sóttkví og sækja styrk og félagsskap hver til annarrar með reglulegum fjarfundum á meðan. Auk innilokunarinnar er hver og ein að eiga við flóknar og á tíðum skoplegar aðstæður í einkalífi sínu sem magnast upp við einangrun og álag sóttkvíarinnar.

Birna Anna og Auður hafa áður sent frá sér margar bækur í sitt hvoru lagi en þær skrifuðu einnig saman skáldsöguna 107 Reykjavík sem kom út á síðasta ári.

Auður segir þær hafa skrifað handrit myndarinnar í kófinu síðastliðið vor. „Þá höfðum við verið innilokaðar í einhverjar vikur og upplifað þennan zoom-veruleika sem einu félagslegu nándina í frekar langan tíma. Eins höfðum við fylgst með fólki í kringum okkur, önnur hélt upp á afmælið sitt með þessu móti ásamt þremur öðrum vinkonum og bara það var svo spes að einhvern veginn varð að gera eitthvað við það,“ segir Auður.

Hvað var það við þessar aðstæður sem vakti áhuga ykkar?

„Það er helst einmanaleikinn sem getur gert fólk svolítið ringlað og stundum hvatvíst,“ svarar Auður. „Og kófið er líka aðeins öðruvísi fyrir einhleypt fólk en þá sem eru í sambúð. Eins reynir þetta á fólk sem er nýbyrjað saman. Eiginlega er allt áhugavert við þessar aðstæður, enda voru þær kallaðar fordæmalausar.“

Hvaða áskoranir voru helstar við að skrifa verk þar sem persónurnar hafa samskipti gegnum fjarfundabúnað og um leið, hvað er skemmtilegast við slíkar aðstæður?

„Í rauninni vorum við að miðla einhverju sem við vorum sjálfar að kynnast, svona snerta á tilfinningunni þegar samskipti eru bara í gegnum fjarskiptabúnað. Svo einhvern veginn var sá raunveruleiki að renna saman við okkur um leið og við skrifuðum þetta. Þannig kannski kom hann svolítið sjálfkrafa.“

Klapptré
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri og ábyrgðarmaður er Ásgrímur Sverrisson.

NÝJUSTU FÆRSLUR