Ari Kristinsson er einn fremsti kvikmyndatökustjóri Íslands. Á ferli sínum hefur hann komið að fjölmörgum af þekktustu kvikmyndum íslenskrar kvikmyndasögu sem stjórnandi kvikmyndatöku, þar á meðal Djöflaeyjunni, Bíódögum, Nýju lífi, Magnúsi, Á köldum klaka og Börnum náttúrunnar, sem tilnefnd var til Óskarsverðlauna sem besta erlenda kvikmyndin.
Í tilkynningu frá ÍKS segir að verk hans einkennist af sterkri sjónrænni nálgun, næmni fyrir íslenskri náttúru og hæfileika til að styðja við frásögn með myndmáli.
Börn náttúrunnar verður sýnd á sérstakri heiðurssýningu í Bíó Paradís þann 28. mars kl. 16:30. Að sýningu lokinni ræðir Ari störf sín og feril með Tómasi Erni Tómassyni forseta ÍKS.
Í tengslum við sýninguna mun ÍKS formlega veita Ara nafnbótina Heiðursfélagi ÍKS. Hann verður þar með annar heiðursfélagi ÍKS frá upphafi, en áður hefur Sigurður Sverrir Pálsson kvikmyndatökustjóri hlotið þann heiður.
