Dagskráin er sem hér segir:
15.00
Vampyr (1932) – 75 mín
Á ferðalagi um sveitir Frakklands um nótt, vaknar hinn ungi Allan Gray upp við við að gamall maður stendur inni í herberginu hans og skilur eftir pakka með áletruninni „opnist eftir dauða minn.“ Í pakkanum leynist dularfull bók um djöfla sem kallast vampírur og á Allan taka að sækja óútskýrð fyrirbæri. Myndin er fyrsta hljóðmynd danska kvikmyndameistarans Carls Th. Dreyer og tekur á hinu dulræna og hræðilega. Dreyer átti í tæknilegum erfiðleikum með hljóðupptökur við gerð myndarinnar en tókst þó að beisla hljóðrásina til að skapa andrúmsloft ótta sem á engan sinn líka þótt hann sleppi ekki alveg tökunum á stíl þöglu myndanna. Viðar Víkingsson leikstjóri og sérlegur aðdáandi Carl Th. Dreyer og hryllings- og fantasíukvikmynda verður með stutta, fróðlega og skemmtilega kynningu fyrir sýninguna.
17.00
Gullsandur (1984) – 98 mín
Gullsandur er gamansöm kvikmynd með pólitísku ívafi sem Ágúst Guðmundson bæði skrifar og leikstýrir. Myndin fjallar um smábæ á suðurströnd Íslands og hvernig gullfundur á nærliggjandi söndum umturnar hinum rólega smábæjaranda í sannkallaða ringulreið. Með aðalhlutverk fara Edda Björgvinsdóttir og Pálmi Gestsson. Ágúst Guðmundsson leikstjóri myndarinnar ræðir við áhorfendur eftir sýninguna.
19.20
The Cars That Ate Paris (1974) – 88 mín
Kvikmynd Peter Weir um bílana sem átu París er frumleg hryllingsmynd með grínívafi og jafnframt hans fyrsta mynd í fullri lengd. Kvikmyndin gerist í smábænum París í Ástralíu þar sem íbúarnir virðast lifa á bílslysum á einn eða annan hátt. Kvikmyndin var sýnd í Cannes árið 1974 og gekk mjög vel. Í dag telst myndin til upphafsára áströlsku nýbylgjunnar og mikilvægra költkvikmynda. Peter Weir skrifaði handritið sem er ádeila á ástralska bílamenningu og áminning um að örar tæknibreytingar geta valdið samfélagslegum skaða. Hann hlaut heiðursverðlaun fyrir ævistarf sitt nýlega bæði í Feneyjum og Óskarsverðlaunahátíðinni.
