Jóhanna af Örk er 62 mínútna kvikmynd sem gerist í sama heimi og fyrri mynd hans, Ástin sem eftir er.
Ástin sem eftir er, með Sögu Garðarsdóttur og Sverri Guðnasyni í aðalhlutverkum, var frumsýnd síðasta sumar og hlaut afar góðar viðtökur bæði gagnrýnenda og áhorfenda. Myndin var jafnframt sú vinsælasta í Bíó Paradís á síðasta ári. Hún fjallaði um listamanninn Önnu og sjómanninn Magga, sem eru nýlega skilin en enn í tilfinningalegu millibilsástandi, þar sem lífið heldur áfram með sínum hætti.
Í Jóhönnu af Örk færist sjónarhornið yfir á börn þeirra, sem eru leikin af Ídu Mekkín Hlynsdóttur, Þorgils Hlynssyni og Grími Hlynssyni. Myndin fylgir þeim í gegnum árstíðirnar þar sem þau reisa riddarafígúru sem þau nota sem skotmark. Í gegnum leik, sköpun og eyðingu dregur myndin upp ljóðræna mynd af uppvexti og þeim umbreytingum sem honum fylgja.
Myndin var heimsfrumsýnd á alþjóðlegu kvikmyndahátíðinni í San Sebastian á síðasta ári. Framleiðendur eru Anton Máni Svansson fyrir STILL VIVID og Katrin Pors fyrir Snowglobe, ásamt meðframleiðendunum Mikkel Jersin og Didar Domehri.
