Að þinginu standa Samband íslenskra kvikmyndaframleiðenda, Samtök kvikmyndaleikstjóra, Félag leikskálda og handritshöfunda, Félag kvikmyndagerðarmanna og Samtök iðnaðarins.
Staðan í greininni og tækifærin í áframhaldandi stuðningi
Í tilkynningu segir að markmið þingsins sé að varpa ljósi á þau miklu tækifæri sem felast í áframhaldandi þróun og stuðningi við kvikmynda- og þáttagerð á Íslandi, bæði menningar- og efnahagslega.
Framleiðsla sjónvarpsþátta og kvikmynda, hvort sem um er að ræða innlend eða erlend verkefni, skapar fjölda beinna og óbeinna starfa og getur vaxið enn frekar með markvissum stuðningi við greinina.
Á þinginu verður farið yfir stöðu greinarinnar, en færri íslenskar kvikmyndir eru frumsýndar í ár en oft áður. Miðað við fyrirliggjandi upplýsingar fækkar þeim enn á næsta ári. Á þinginu verður farið yfir tillögur að frekari fjárfestingu sem skila mun auknum efnahagsumsvifum en ekki síður menningarverðmætum og fjölbreyttu framboði efnis á íslensku.
Anton Máni Svansson, formaður SÍK og Hrönn Kristinsdóttir, stjórnarmaður í SÍK munu fara yfir stöðu greinarinnar og tækifærin sem felast í viðbótarfjárfestingu í kvikmyndagerð. Sigurður Hannesson, framkvæmdastjóri Samtaka iðnaðarins og Gísli Snær Erlingsson, forstöðumaður Kvikmyndamiðstöðvar, ávarpa þingið.
Fundarstjóri verður Hrönn Sveinsdóttir, formaður SKL.
Þá mun fólk úr ólíkum áttum innan greinarinnar líta við á milli dagskrárliða ásamt Bergi Ebba sem ætlar að fjalla um afnám tortryggninnar.
Logi Einarsson, menningar-, nýsköpunar- og háskólaráðherra, lokar þinginu.
