Umræðan er hluti af bransadögum Stockfish, en heildardagskrána má sjá hér.
Aðgangur er ókeypis. Stockfish kynnir umræðuna svo:
Kvikmyndagerð hefur verið á mikilli siglingu hérlendis undanfarin ár og hróður íslenskra kvikmynda- og sjónvarpsþátta farið víða. Hver króna sem ríkið fjárfestir í kvikmyndaiðnaðinum skilar sér margfalt til baka. Þrátt fyrir það á fagið nú undir högg að sækja með lækkun framlaga til Kvikmyndasjóðs.
Endurgreiðslukerfi kvikmynda- og sjónvarpsþátta er tiltölulega nýtilkomið á Íslandi, en vert að staldra við og meta stöðuna: Hvað höfum við lært og hvert stefnir íslensk kvikmyndagerð í dag?
Umræðum stýrir blaðakonan Marta Balaga.
Við pallborðið, sem fram fer í Norræna húsinu laugardaginn 12. apríl kl. 14, koma saman fulltrúar allra fagfélaga í kvikmyndagerð á Íslandi, auk þeirra Gísla Snæs Erlingssonar, forstöðumanns Kvikmyndamiðstöðvar og Örnu Kristínu Einarsdóttur, skrifstofustjóra skrifstofu menningar og skapandi greina hjá Mennta- og menningarráðuneytinu. Fulltrúar fagfélaganna eru Hrönn Sveinsdóttir Samtök kvikmyndaleikstjóra (SKL), Anton Máni Svansson formaður Samtaka íslenskra kvikmyndaframleiðenda (SÍK), Hilmar Sigurðsson frá Samtökum íslenskra kvikmyndaframleiðenda (SÍK), Drífa Freyju- og Ármannsdóttir frá Félagi leikmynda- og búningahönnuða (FLB), Sveinbjörn I. Baldvinsson formaður Félags handritshöfunda og leikskálda (FIH), Sigríður Rósa Bjarnadóttir frá Félagi kvikmyndagerðarmanna (FK) og María Sigríður Halldórsdóttir formaður Félags kvenna í kvikmyndum og sjónvarpi (Wift). Hilmar Sigurðsson verður með stutta samantekt áður en pallborðið hefst.
