Í nýju sérhefti Variety sem helgað er þeim kvikmyndum sem taka þátt í Óskarsvalinu á erlendri kvikmynd ársins er Þrestir Rúnars Rúnarssonar meðal þeirra sjö mynda sem þykja eiga mesta möguleika úr hópi evrópskra.
Í heftinu er farið í gegnum svæði heimsins og skoðaðar helstu myndirnar frá hverju þeirra fyrir sig. Ummæli Variety má sjá hér fyrir neðan, en athygli vekur að þetta er þriðja árið í röð sem stóru erlendu kvikmyndafagmiðlarnir telja íslenska kvikmynd eiga möguleika í Óskarsvalinu – í fyrra voru það Hrútar og þar áður Hross í oss.
Sýningar á Þröstum vegna Óskarsforvalsins fara fram í nóvember og desember í Los Angeles. Fyrir nokkru samþykkti ríkisstjórnin sérstaka fjárveitingu til myndarinnar vegna Óskarsvalsins.