Minning | Ingibjörg Haraldsdóttir 1942-2016

Ingibjörg Haraldsdóttir ljóðskáld, þýðandi og kvikmyndagagnrýnandi er látin 74 ára að aldri. Ingibjörg lærði kvikmyndagerð við Kvikmyndaskóla ríkisins (VGIK) í Moskvu og lauk Mag. art prófi í kvikmyndastjórn þaðan 1969. Frá árinu 1975 skrifaði hún um kvikmyndir fyrir dagblaðið Þjóðviljann um árabil. Hennar verður minnst fyrir skarpa og næma sýn sína á kvikmyndalistina.

Hér eru tvö dæmi um skrif hennar um kvikmyndir í Þjóðviljann:

Um The Passenger eftir Antonioni (frá 9. maí 1976).

Um Land og syni Ágústs Guðmundssonar (frá 29. janúar 1980).

Æviágrip

Ingibjörg Haraldsdóttir fæddist í Reykjavík 21. október 1942 og ólst þar upp. Eftir námið í Moskvu starfaði hún sem aðstoðarleikstjóri við leikhúsið Teatro Estudio í Havana á Kúbu frá 1970 – 1975. Hún skrifaði og þýddi blaðagreinar, aðallega fyrir Þjóðviljann, meðan hún dvaldi í Sovétríkjunum og á Kúbu. Eftir heimkomuna til Íslands í árslok 1975 vann hún sem blaðamaður og kvikmyndagagnrýnandi á Þjóðviljanum um árabil, auk þess að koma að starfi Kvikmyndahátíðar Listahátíðar.

Frá 1981 var Ingibjörg ljóðskáld og þýðandi að aðalstarfi, en fyrsta ljóðabók hennar, Þangað vil ég fljúga, kom út árið 1974. Ingibjörg gaf út sjö ljóðabækur, þar af tvær safnbækur, og hafa ljóð hennar verið þýdd á ungversku, þýsku, lettnesku, litháísku, búlgörsku, rússnesku, slóvakísku, ensku og Norðurlandamál. Hún hlaut ýmsar viðurkenningar fyrir ritstörf sín, meðal annars Ljóðaverðlaun Guðmundar Böðvarssonar, Íslensku bókmenntaverðlaunin, Menningarverðlaun DV fyrir þýðingu sína á Fávitanum eftir Dostojevskí og Íslensku þýðingarverðlaunin 2004 fyrir Fjárhættuspilarann eftir sama höfund. Þá var hún tvisvar tilnefnd til Bókmenntaverðlauna Norðurlandaráðs, 1993 og 2004.

Ingibjörg var afkastamikill þýðandi, aðallega úr spænsku og rússnesku. Hún þýddi meðal annars skáldsögur eftir Dostojevskí og Búlgakov, fjölda leikrita eftir ýmsa höfunda og þýðingar hennar á ljóðum og smásögum spænsku- og rússneskumælandi höfunda birtust í tímaritum og voru fluttar í útvarpi.

Ingibjörg sat í stjórn Rithöfundasambands Íslands frá 1992 – 1998 og var formaður sambandsins frá 1994 – 1998. Hún var í ritnefnd Tímarits Máls og menningar frá 1977 og var aðstoðarritstjóri tímaritsins frá 1993 – 2000. Hún átti sæti í ritnefnd tímarits þýðenda, Jón á Bægisá.

Ingibjörg lætur eftir sig tvö börn og þrjú barnabörn.

 

Athugasemdir

álit

Um höfundinn
Klapptré er sjálfstæður miðill sem birtir fréttir, viðhorf, gagnrýni og tölulegar upplýsingar um íslenska kvikmynda- og sjónvarpsbransann. Ritstjóri og ábyrgðarmaður er Ásgrímur Sverrisson.

Tengt efni