Skjaldborg – hátíð íslenskra heimildamynda – verður haldin í tíunda sinn á Patreksfirði um hvítasunnuhelgina næstkomandi, 13.-15. maí. Í ár verða frumsýndar 13 nýjar íslenskar heimildamyndir, auk nokkurra verka í vinnslu. Heiðursgestur hátíðarinnar í ár er spænski kvikmyndagerðarmaðurinn Jose Luis Guerin.
Hátíðin mun að vanda fara fram í Skjaldborgarbíói en þar er um þessar mundir verið að koma upp splunkunýju DCP sýningarkerfi. Fastir liðir verða á sínum stað; skrúðganga, limbókeppni og afhending Einarsins, áhorfendaverðlauna Skjaldborgar, svo eitthvað sé nefnt.
Heiðursgestur hátíðarinnar í ár er spænski kvikmyndagerðarmaðurinn Jose Luis Guerin en óhætt er að segja að hann sé ein af kanónum heimildamyndagerðar samtímans. Guerin er sérstaklega þekktur fyrir að vinna á mörkum heimildarmynda og leikinna mynda, þannig að hann fléttar saman formunum og leikur sér með þau. Sýndar verða þrjár myndir eftir Guerin auk þess sem hann mun vera með masterclass í Skjaldborgarbíói sunnudaginn 15. maí.
Allar frekari upplýsingar er að finna á vef hátíðarinnar, en þar verður tilkynnt um dagskrána í lok vikunnar.
