Þrestir Rúnars Rúnarssonar hefur sópað að sér verðlaunum á alþjóðlegum hátíðum undanfarnar vikur. Um síðustu helgi hlaut hún aðalverðlaun Alþjóðlegu kvikmyndahátíðarinnar í Prag í Tékklandi, um þar síðustu helgi dómefndarverðlaunin í Mamers í Frakklandi og þar áður aðalverðlaun alþjóðlegu hátíðarinnar Spirit of Fire sem fram fór í borginni Khanty-Mansiysk í Síberíu, Rússlandi. Þrestir hefur nú unnið til alls 16 alþjóðegra verðlauna.
Rúnar segir þetta lyginni líkast:
Maður veit eiginlega ekki hvað maður á að segja lengur. Ég hef upp til hópa verið ótrúlega heppin með samstarfsfólk í gegnum tíðina og fólkið á bak við Þresti er engin undantekning. Listamenn og fagfólk með hæfileika og bjartsýni að vopni. Fólk sem getur skapað og flutt fjöll. Íslensk kvikmyndagerð hefur verið að ná ótrúlegum árangri á undanförnum árum og það er gaman að hafa möguleika á að taka þátt í þessu ævintýri.
Lilja Ósk Snorradóttir framleiðandi bætir við:
Þetta er búið að vera ótrúlegt ævintýri frá upphafi og skemmtilegt að fá að taka þátt í því. Þetta er ekki aðeins mikill heiður fyrir Rúnar og allt það hæfileikaríka fólk sem tók þátt í gerð myndarinnar heldur hjálpar þetta mikið til við dreifingu og framtíðarverkefni.
