Steinunn Ólína Þorsteinsdóttir vann um nýliðna helgi til FIPA verðlaunanna sem besta leikkona í aðalhlutverki fyrir leik sinn í sjónvarpsþáttaröðinni Réttur, sem var nýlega sýnd á Stöð 2. FIPA hátíðin verðlaunar sjónvarpsþætti á hverju ári og fór fram í 29. sinn 19.-24. janúar í Biarritz í Frakklandi.
Baldvin Z leikstjóri þáttaraðarinnar var viðstaddur og veitti verðlaununum viðtöku. Fyrstu tveir þættirnir af Rétti voru sýndir á hátíðinni og þá var fyrsti þátturinn af Ófærð, sem er nú í sýningum á RÚV, sýndur á lokakvöldi hátíðarinnar. Steinunn Ólína leikur einnig aukahlutverk í Ófærð.
Réttur hóf göngu sína um miðjan október á Stöð 2. Red Arrow International sér um sölu og dreifingu þáttaraðarinnar erlendis. Réttur, sem er framleidd af Sagafilm, keppti við 10 alþjóðlegar sjónvarpsþáttaraðir, þeirra á meðal hina bresku River, sem sænski leikarinn Stellan Skarsgård hlaut hlaut FIPA verðlaun fyrir sem besti leikari í aðalhlutverki.
Sjá nánar hér: Steinunn Ólína valin besta leikkonan á FIPA hátíðinni | Kvikmyndamiðstöð Íslands
