Guðmundur Ingi Þorvaldsson fer með aðalhlutverkið í nýrri bresk/íslenskri spennumynd, Chasing Robert Barker, sem heimsfrumsýnd verður á RIFF. Leikstjóri og handritshöfundur er Daniel Florêncio, sem einnig framleiðir ásamt Snorra Þórissyni hjá Pegasus.
Söguþræði er svo lýst:
Kvöld eitt, þegar lítið hefur gengið á, fær David – 38 ára gamall papparass í London – ábendingu um að stjörnuleikarinn Robert Barker sitji og snæði kvöldverð með ungri konu á fínum veitingastað. Ljósmyndirnar sem hann nær komast á forsíðu blaðsins sem hann vinnur fyrir og fréttin slær í gegn þannig að ritstjórinn Olly krefst þess að sjá meira. Upphefst þá eltingaleikur við Barker í von um að ná fleiri myndum – en David verður að horfast í augu skaðann sem slúðurblöðin og óvarleg meðhöndlun á sannleikanum hafa ollið honum í fortíðinni.
Þetta er fyrsta kvikmynd Florêncio sem áður hefur gert stuttmyndir og heimildamyndir.
